भांगरभूंय | प्रतिनिधी
नवी दिल्ली, खबरां संस्था: फाटल्या १५ वर्सां परस चड काळा सावन आडकल्ल्या मुंबय- गोंय महामार्गा विशीं केंद्रीय रस्ते येरादारी मंत्री नितीन गडकरी हांणी आतां नवो म्हुर्त दिला. दादरच्या अमर हिंद मंडळाचे ८५ वे वसंत व्याख्यानमाळेंत ते उलयताले. फाटल्या कांय वर्सांनी देशांतली मुळावी सुविधा आनी उदरगती विशीं ते उलयताले.
नितीन गडकरी हांणी मुंबय – गोंय महामार्गाचो विशय काडटांच तांकां हासूंक आयलें. तांणी म्हणलें, ‘मुंबय- गोंय महामार्गा खातीर खूब आडखळी आयल्यो, मात तुमी हुस्को करूंक नाकात. अंदूंच्या जून म्हयन्या मेरेन हो रस्तो १०० टक्के पुराय जातलो. दिल्ली -जयपूर आनी मुंबय- गोंय आमच्या विभागांतलो ब्लॅक स्पॉट. ताका येवपी आडमेळीं भरपूर आसात. कोकणचें सत सांगल्यार तुमकां चलचें ना.’’
मुंबय-गोंय महामार्गाची सध्याची स्थिती?
मुंबय-गोंय महामार्गाच्या पयल्या टप्प्यांतल्या पळस्पे ते इंदापूर ह्या ८४ किलोमिटर लांबायेच्या मार्गाचें काम २०१० वर्सा सुरू जाल्लें. १५व्या वर्साय हें काम पुराय जावंक ना. दुसर्या टप्प्यांतल्या इंदापूर ते झाराप ह्या कामाक २०१४त सुरवात जाली . तें २०१६ वर्सा मेरेन पुराय जावप अपेक्षीत आशिल्लें. २०२५ उजवाडलो तरी हें काम पुराय जावंक ना. सिंधुदुर्ग जिल्ह्यांतलीं चडशीं कामां पुराय जालीं तरी रायगड आनी रत्नागिरी जिल्ह्यांतलीं आडकून पडल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
