भांगरभूंय | प्रतिनिधी
इंडियन प्रिमीयर लिगेंत (आयपीएल) काल जाल्ले दुसरे मॅचींत पंजाब किंग्सान येजमान मुंबय इंडियन्साक 13 धांवड्यांनी हारयलो. पंजाब किंग्सान दिल्ले 215 धांवड्यांचो फाटलाव करतना मुंबय इंडियन्साक 6 विकेटी वगडावन 201 मेरेन मजल मारप शक्य जालें.
अखेरचे ओव्हरींत पंजाबाचो फास्ट बॉलर अर्शदीप सिंगान 16 धांवड्यांची योग्य रितीन राखण केली. ताणें तिलक वर्मा आनी नेहल वधेरा हांकां सेगीत दोन बॉलांचेर बोल्ड करून पंजाबाचें जैत निश्चीत केलें. अर्शदीपान मॅचींत वट्ट चार विकेटी घेतल्यो.
मुंबय इंडियन्सा वतीन सुर्यकुमार यादवान 57 आनी कॅमरुन ग्रीनान 67 धांवड्यो केल्यो.
ते आदीं मुंबय इंडियन्सान टॉस जिखून पयलीं पंजाब किंग्साक बॅटींग करपाचें आमंत्रण दिलें. कॅमेरून ग्रीनान तिसरे ओव्हरींत पंजाब किंग्साक धपको दीत मॅथ्यू शॉर्टाक (11) बाद केलो. प्रभसिमरन सिंग (25) आनी अथर्व तायडे हांणी 24 बॉलांनी 47 धांवड्यो केल्यो. सातवे ओव्हरींत अर्जुन तेंडुलकरान उत्कृश्ट यॉर्कर घालून ही जोडी फोडली. लाएम लिव्हिंगस्टोनाक (10) पियुष चावलान बाद केलो. तेच ओव्हरींत अथर्व तायडे (29) बोल्ड जालो.
15वे ओव्हरी मेरेन पंजाबाच्यो 4 बाद 118 धांवड्यो जाल्ल्यो. मुखेली रोहित शर्मान 16वी ओव्हर अर्जुन तेंडुलकराक घालपाक दिली. सॅम करन आनी हरप्रीत हांणी 31 धांवड्यांचो पावस घालो. ते उपरांत 17वे ओव्हरींत 13 आनी 18वे ओव्हरींत 25 धांवड्यो आयल्यो. हरप्रीतान 28 बॉलांनी चार चवके आनी दोन सक्यांचे मजतीन 41 धांवड्यो केल्यो. जितेश शर्मान येना फुडेंच दोन सके मारले. 19वे ओव्हरींत सॅम करन बाद जालो. ताणें 29 बॉलांनी 5 चवके आनी चार सक्यांचे मजतीन 55 धांवड्यो केल्यो. जितेश 7 बॉलांनी 25 धांवड्यो करून बाद जालो. ताणें चार सके मारले. अशे तरेन पंजाब किंग्सान 8 विकेटी वगडावन 214 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
