भांगरभूंय | प्रतिनिधी
मुंबय इंडियन्सान बायलांचे प्रिमियर लिगेचे (डब्ल्यूपीएल) फायनलींत सुवात मेळयली. मुंबय इंडियन्सान हांगाच्या डी व्हाय पाटील स्टेडियमाचेर जाल्ले एलिमिनेटर मॅचींत युपी वॉरियर्साक 72 धांवड्यांनी हारयलो.
मुंबय इंडियन्स आतां फायनलींत दिल्ली कॅपिटल्सा आड खेळटलो. मुंबयच्या जैतांत नॅट सिव्हर ब्रंटाची अश्टतासांची कामगिरी आनी इझी वोंगची हॅट्रीक हाचो व्हड वांटो आसा.
मजगतीं, युपी वॉरियर्सान टॉस जिखून पयलीं फिल्डींग करपाचो निर्णय घेतलो. मुंबय इंडियन्सान निर्धारीत 20 ओव्हरींनी 4 विकेटी वगडावन 182 धांवड्यो केल्यो. ब्रंटान नाबाद 72 धांवड्यांची खेळी केली. मुंबयच्या धांवड्यांक प्रत्युत्तर दितना युपी वॉरियर्साचो डाव 17.4 ओव्हरींनी 110चेर सोंपलो. इझी वोंगान चार ओव्हरींनी 15 धांवड्यो दीत 4 विकेटी घेतल्यो. बायलांचे प्रिमियर लिगेंत हॅट्रीक घेवपी वोंग पयली बॉलर थारली. तिणें नवगिरे, सिमरन शेख आनी सोफी एक्लेस्टोन हिका बाद केली.
ते पयलीं मुंबय इंडियन्सान 183 धांवड्यांची कठीण मोख युपी मुखार दवरली. ब्रंटान फकत 38 बॉलांनी नाबाद 72 धांवड्यांची खेळी केली. हातूंत णव चवके आनी दोन सक्यांचो आस्पाव आशिल्लो. अमेलिया केरान 19 बॉलांनी 29, हिली मॅथ्यूजान 26 बॉलांनी 26 आनी यास्तिका भाटियान 18 बॉलांनी 21 धांवड्यो केल्यो.
करात वा मरात मॅचींत मुखेली हरमनप्रीत कौराक मात व्हड खेळी करपाक जमली ना. तिणें 15 बॉलांनी फकत 14 धांवड्यो केल्यो. अखेरचे ओव्हरींत पुजा वस्त्रकरान चार बॉलांनी 11 धांवड्यो करून नाबाद रावली. युपी वॉरियर्सा वतीन सोफी एक्लेस्टोनान दोन जाल्यार अंजली सरवानी आनी पार्श्वी चोपडा हिणें दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
