भांगरभूंय | प्रतिनिधी
19 वे ओव्हरींतले दोन सके आनी मुखेली रोहित शर्मा, ईशान किशन आनी तिलक वर्मा हांच्या उपेगी बॅटिंगे नेटार मुंबय इंडियन्सान अंदूंचे इंडियन प्रिमीयर लिगेंत (आयपीएल) पयलें जैत जोडलें.
अखेरच्या बॉला मेरेन रंगिल्ले मॅचींत पांच खेपेचो वस्ताद मुंबय इंडियन्सान दिल्ली कॅपिटल्साक 6 विकेटींनी हारयलो. मुंबय इंडियन्साक निमाणे ओव्हरींत पांच धांवड्यांची गरज आशिल्ली. पूण, दिल्लीचो फास्ट बॉलर एन्रीक नोर्त्यान आपले उत्कृश्ट बॉलिंगे नेटार 25.75 कोटी रुपयांची बोली लागिल्ल्या ग्रीन-डॅव्हिड हांकां घाम काडलो.
मुंबय इंडियन्सान दिल्ली कॅपिटल्सा आड पयले खेपे 170 परस चड धांवड्यांचो येसस्वी रितीन फाटलाव केलो.
ते पयलीं मुखेली डॅव्हिड वॉर्नरान परतून एकदा उपेगी खेळी केली. हे खेपे ताका उप मुखेली अक्षर पटेलाची बरी साथ लाबली. दोगांयनी सवे विकेटी खातीर बरी भागिदारी करून दिल्ली कॅपिटल्साक सन्मानजनक स्कोर उबारून दिलो.
मुंबय इंडियन्साच्या पियुष चावलान सुरवातीक तीन धपके दिल्ले. पूण, मदले ओव्हरींनी दिल्ली कॅपिटल्सान बरो खेळ केलो. अक्षर पटेलान 25 बॉलांनी 54 धांवड्यो केल्यो. जेसन बेहरेनडॉफान 19वे ओव्हरींत मुंबय इंडियन्साक चार विकेटी मेळोवन दितना मोख मात्शी उणी केली. 18वे ओव्हरींत 5 बाद 165 धांवड्यांचेर आशिल्ल्या दिल्ली कॅपिटल्स फुडल्या 10 ओव्हरींनी 7 धांवड्यो करून तंबूंत परतलो.
ओपनर पृथ्वी शॉ (15), मनीष पांडे (26), ललीत यादव (2) आनी रोव्हमन पॉवेल (4) रोखडेच बाद जाल्ल्यान दिल्लीचो डाव गडगडिल्लो. पूण, सातत्यान बरी बॅटींग करपी मुखेली वॉर्नरान पंगडाक सांबाळपाची भुमिका घेतली.
मुंबय इंडियन्साच्या पियुष चावलान 22 धांवड्यांनी 3 विकेटी घेवन आपलो अणभव दाखोवन दिलो. फाटल्या दोन मॅची भशेन वॉर्नरान हे खेपे लेगीत पंगडाक सांबाळपाचें काम केलें.
मजगतीं अक्षरान आपलो अर्द शेंकडो पुर्ण करतना वॉर्नरा वांगडा 67 धांवड्यांची भागिदारी केली. 19वे ओव्हरींत दोगूय जेसन बेहरेनडॉर्फाक मोठे शॉर्ट मारपाच्या यत्नांत कॅच बाद जाले.
पटेलान 25 बॉलांनी चार चवके आनी पांच सक्यांचे मजतीन 54 धांवड्यो केल्यो, जाल्यार वॉर्नरान 47 बॉलांनी 51 धांवड्यो केल्यो. फुडल्या बॉलाचेर कुलदीप यादव धांवबाद जालो. अभिषेक पोरेल एक धांवडी करून बाद जालो. बेहरेनडॉर्फाचे हे ओव्हरींत चार विकेटी मेळ्ळ्यो. ताणें तीन ओव्हरींनी 23 धांवड्यो दिवन 3 विकेटी घेतल्यो. रिले मेरिडिथनान अखेरची विकेट घेवन दिल्लीचो डाव 19.4 ओव्हरींनी 172चेर सोंपयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
