भांगरभूंय | प्रतिनिधी
मुंबय इंडियन्सान बायलांचे प्रिमियर लिगेच्या (डब्ल्यूपीएल) पयल्या हंगामांतली पयली मॅच जिखली. ताणें हांगाच्या डॉ. डी व्हाय पाटील स्पोर्ट्स अकादमीच्या मैदानाचेर जाल्ले मॅचींत गुजरात जायण्ट्साक 143 अशा व्हडा धांवड्यांच्या फरकान हारयलो.
मुंबय इंडियन्सान दिल्ले 208 धांवड्यांचो फाटलाव करपी गुजरात जायण्ट्साचो डाव 15.1 ओव्हरींनी फकत 64 धांवड्यांचेर सोंपलो. मुंबय इंडियन्साच्या जैतांत दावखुरी स्पिनर साईका इशाक आनी मुखेली हरमनप्रीत कौर पर्जळ्ळीं.
इशाकान 3.1 ओव्हरींनी 4 विकेटी घेतल्यो, जाल्यार मुखेली कौरान लिगेंतलो पयलो अर्द शेंकडो नोंदयलो. तिणें 14 चवक्यांचे मजतीन 65 धांवड्यांची आक्रमक बॅटींग केली.
मोखीचो फाटलाव करपी गुजराताच्या एकाय बॅटराक व्हड खेळी करपाक जमली ना. डायलन हेमलता हिणें सगल्यांत चड 29 धांवड्यो केल्यो. तिचे उपरांत निमाणे सुवातेर बॅटिंगेक आयिल्ले मोनिका पटेलान 10 धांवड्यांचें योगदान दिलें. हांकां सोडलीं, जाल्यार एकाय बॅटराक दोट्टी आंकडो हुपपाक जमलो ना. गुजराताचे चार बॅटर शुन्याचेर बाद जाले.
ते पयलीं टॉस हारल्या उपरांत पयलीं बॅटींग करपी मुंबय इंडियन्सान निर्धारीत 20 ओव्हरींनी 5 विकेटी वगडावन 207 धांवड्यो केल्यो. सुरवात बरी जावंक नाशिल्ल्यान मुंबय इंडियन्स दोनश्यांचो टप्पो हुपतलो अशें मातूय दिसूंक नाशिल्लें.
तिसरे ओव्हरींत यास्तिका भाटिया बाद जाली. तिचे उपरांत नॅटली सिव्हर ब्रंटान हॅली मॅथ्यूजा वांगडा मेळून 54 धांवड्यांची भागिदारी केली. सिव्हर 23 धांवड्यो करून बाद जाली. सिव्हरा उपरांत मॅथ्यूज लेगीत 47 धांवड्यो करून तंबूंत परतली. मुंबय इंडियन्सान 77चेर 3 विकेटी वगडायल्या उपरांत मुखेली हरमनप्रीत कौरान अमिलिया केरा वांगडा मेळून डाव मुखार व्हेलो.
दोगांयनी फकत 42 बॉलांनी 89 धांवड्यांची भागिदारी केली.
हरमनप्रीत 30 बॉलांनी 65 धांवड्यो करून बाद जाली. केरान अखेर मेरेन पुजा वस्त्रकरा वांगडा मेळून 17 बॉलांनी 35 धांवड्यांची भागिदारी करून स्कोर 200च्या वयर व्हेलो. केर 45 धांवड्यो करून इजी वॉन्ग (नाबाद 6) हिच्या वांगडा नाबाद रावली.
गुजराता वतीन स्नेह राणान सगल्यांत चड दोन विकेटी घेतल्यो. अॅश्ले गार्डनर, जॉर्जिया वॅयरहम आनी तनुजा कंवर हांणी दरेकी एक विकेट घेतली.
नॅटली सिव्हर आनी हेली मॅथ्यूज हांणी लिगेंतली पयली अर्द शेंकड्याची भागिदारी केली. दोगांयनी दुसरे विकेटी खातीर 38 बॉलांनी 54 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
