भांगरभूंय | प्रतिनिधी
पंजाब किंग्सान मुंबय येवन मुंबय इंडियन्साक हारयिल्लो. अर्शदीप सिंगाचे बॉलिंगे मुखार वानखेडेंत मुंबय इंडियन्साक हार घेवची पडिल्ली. ते हारीची मुंबय इंडियन्सान व्याजा सयत परतफेड केली.
पंजाब किंग्सान जैता खातीर दिल्ली 215 धांवड्यांची मोख मुंबय इंडियन्सान सहज मेळयली. ताणें 18.5 ओव्हरींनी 4 विकेटी वगडावन 216 धांवड्यो केल्यो.
सुर्यकुमार यादव आनी इशान किशन हांणी मोहालींत धांवड्यांचो पावस घालो. तांचे बॅटिंगेक लागून पंजाबाचे बॉलर लायन लॅथ विसरले काय कितें अशें दिसपाक लागिल्लें. दरेक बॉक शिमे भायर वतना दिसलो. तिलक वर्मा आनी टीम डॅव्हिडान मॅच सोंपयली. अर्शदीप सिंगान 3.5 ओव्हरींनी 66 धांवड्यो दिवन फकत ए विकेट घेतली.
ते आदीं मुंबय इंडियन्साचो मुखेली रोहित शर्मान टॉस जिखून पंजाब किंग्साक पयलीं बॅटींग करपाचें आमंत्रण दिलें. अर्शद खानान ताचे पयलेच ओव्हरींत प्रभसिमरन सिंगाक (9) बाद केलो. विकेटकीपर इशान किशनान ताची कॅच धरली.
शिखर धवन आनी मॅथ्यू शॉर्ट हांणी दुसरे विकेटी खातीर दुसरे विकेटी खातीर 35 बॉलांनी 49 धांवड्यांची भागिदारी केली. मुंबय इंडियन्साचो येसस्वी बॉलर पियुष चावलाची बॉलींग शिखर धवनान फोडून काडली. पूण, अखेरेक ताणेंनूच धवनाक बाद केलो. 20 बॉलांनी 30 धांवड्यो करून धवन स्टम्प बाद जालो. हे विकेटी सयत पियुषान आयपीएलांत सगल्यांत चड विकेटी घेवपाचे वळेरेंत लसिथ मलिंगाक (170) फाटीं घालून चवथी सुवात मेळयली. ते उपरांत ताणें मुंबय इंडियन्सा खातीर खरतनाक थारपी मॅथ्यू शॉर्टाक बोल्ड केलो. ताणें 172 विकेटी घेवन अमित मिश्राची बरोबरी केली. शॉर्ट 27 धांवड्यांचेर बाद जालो.
लिएम लिव्हिंगस्टन आनी जितेश शर्मा हांचेर धांवड्यांची गती वाडोवपाची जापसालदारकी आशिल्ली. मुंबय इंडियन्साची बरी बॉलींग चालूच आशिल्ली. पूण, जितेशान आपली आक्रमक भुमिका कायम राखतना अदीं मदीं सके मारले. जितेशान चवथे विकेटी खातीर लिव्हिंगस्टोना वांगडा 23 बॉलांनी अर्द शेंकड्याची भागिदारी केली. हातूंत ताच्या 11 बॉलांनी 24 धांवड्यांचो आस्पाव आशिल्लो.
ह्या दोगांयनी अखेरच्या ओव्हरींनी 13-14चे सरासरीन धांवड्यो केल्यो. लिव्हिंगस्टोनान 32 बॉलांनी अर्द शेंकडो पुर्ण केलो. जोफ्रा आर्चर अपेशी थारलो. लिव्हिंगस्टोनान ताचे बॉलिंगेचेर सके मारले. 19वे ओव्हरींत सेगीत तीन सके मारून जितेशा वांगडा 46 बॉलांनी शेंकड्याची भागिदारी केली.
आर्चराचे ते ओव्हरींत 27 धांवड्यो आयल्यो. त्या मानान आकाश मढवालान अखेरची ओव्हर बरी घाली. ताणें फकत 9 धांवड्यो दिल्यो आनी पंजाबान 3 बाद 214 धांवड्यो केल्यो. जितेशान 27 बॉलांनी 5 चवके आनी 2 सक्यांचे मजतीन नाबाद 49 धांवड्यो केल्यो. लिव्हिंगस्टोनान 42 बॉलांनी 7 चवके आनी चार सक्यांचे मजतीन नाबाद 82 धांवड्यो केल्यो आनी जितेशा वांगडा 53 बॉलांनी 119 धांवड्यांची भागिदारी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
