भांगरभूंय | प्रतिनिधी
सुर्यकुमार यादवाच्या शेंकड्याच्या नेटार येजमान मुंबय इंडियन्सान गुजरात टायटन्साक 27 धांवड्यांनी हारयलो.
वानखेडे मैदानाचेर जाल्ले मॅचींत मुंबय इंडियन्सान पयलीं बॅटींग करतना 5 विकेटी वगडावन 218 धांवड्यो केल्यो. मोखीचो फाटलाव करपी गुजरात टायटन्साक 8 विकेटी वगडावन 191 धांवड्यो करप शक्य जाल्यो. गुजराता वतीन राशिद खानान अर्द शेंकड्याची खेळी केली. ताणें 79 धांवड्यांचें योगदान दिलें. डॅव्हिड मिलरान 41 आनी विजय शंकरान 29 धांवड्यो केल्यो. मुंबय इंडियन्सा वतीन आकाश मधवाललान सगल्यांत चड 3 विकेटी घेतल्यो.
मोखीचो फाटलाव करतना गुजरात टायटन्साची सुरवात बाबत जाली. दुसरे ओव्हरींत वृद्धमान साहाची विकेट वगडायली. मुखेली हार्दिक पांड्या लेगीत तिसरे ओव्हरींत कॅच बाद जालो. चवथे ओव्हरींत ओपनर शुभमन गिलाक आकाश मधवालान बोल्ड केलो. गुजराताक 6 ओव्हरींनी 3 विकेटी वगडावन 48 धांवड्यो करप शक्य जाल्यो. गुजराताचो पंगड 150 भितर तंबूंत वतलो अशें दिशिल्लें. पूण, राशिद खानान एक बाजू सांबाळून धरली. ताणें मुंबय इंडियन्साची बॉलींग फोडून काडली. मुंबय इंडियन्स मॅच बेगीन सोपोवपाक सोदतालो. पूण, राशिदान अखेरचे ओव्हरी मेरेन मॅच व्हेली. ताणें 32 बॉलांनी सगल्यांत चड 79 धांवड्यो केल्यो.
ते पयलीं मुंबय इंडियन्सान टॉस जिखून पयलीं बॅटिंग करपाचो निर्णय घेतलो. सुर्यकुमार यादवान आयपीएलांतलो पयलो शेंकडो मारलो. ताणें 49 बॉलांनी नाबाद 103 धांवड्यो केल्यो. डावाचे अखेरचे बॉलाचेर सको मारून ताणें शेंकडो पुर्ण केलो. ताणें विष्णू विनोदा वांगडा 42 बॉलांनी 65 आनी कॅमेरून ग्रीना वांगडा 18 बॉलांनी नाबाद 54 धांवड्यांची भागिदारी केली. ग्रीना वांगडा भागिदारी करतना सुर्यान 15 बॉलांनी 50 धांवड्यो केल्यो.
गुजरात टायटन्सान पावर प्लेंत एक लेगीत विकेट घेवंक ना. पूण, सातवे ओव्हरींत राशिद खानान पंगडाक दोन विकेटी मेळोवन दिल्यो. ताणें सातवे ओव्हरींत रोहित शर्मा आनी इशान किशन हांकां तंबूंत धाडले. ते उपरांत नेहल वढेरा आनी टीम डॅव्हिड हांकां बाद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
