भांगरभूंय | प्रतिनिधी
मुरगांव, प्रतिनिधी: पश्चीम मुंबयच्यान एके नेण्टे चलयेक पळोवन हाडिल्ल्या रोड रोमियोक गोंयांत (वास्को) पुलिसांनी सांपळो रचून ताब्यांत घेतलो. ते नेण्टे चलयेक मेरशेच्या ‘अपना घर’ हांगा धाडल्या.
मुंबय मालवणी पुलीस स्टेशनाचेर ३ जानेवारी दिसा एके नेण्टे चलयेचें अपहरण केल्ल्याची कागाळ दाखल केल्ली. उपरांत पुलिसांनी ते चलयेचो सोद घेवपाक सुरवात केली. निमाणी ती चली आनी तिचें अपहरण करपी गोंयांत, वास्को शारांत आशिल्ल्याचें मोबायला वरवीं समजलें. पुलिसांनी रोखडीच हे विशीं वास्को पुलिसांक म्हायती दिली. तशेंच ते चलयेच्या कुटुंबांतलेय गोंयांत आयले.
वास्को पुलीस निरीक्षक कपील नायक हांच्या फुडारपणा खाला उपनिरीक्षक रोहन नागेशकार, सहाय्यक पुलीस उपनिरीक्षक सुरेश वेळीप, हवालदार संदीप नायक, हवालदार दामोदर मयेंकार, शिपाय रवींद्र रुद्रगुल हांणी सांपळो रचून बुधवारा सांजेवेळार मुरगांव पालिके मुखारच्यान ते चलयेक आनी अपहरण करपी गुलाब सलिम खान (२९, रा. अदंबरी नवाडा राजोली – बिहार) हाका ताब्यांत घेवन ते चलयेक सोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
