भांगरभूंय | प्रतिनिधी
मुंबय, खबरां संस्था: न्यूझीलॅण्डान सेगीत तिसरे टेस्ट मॅचींत टीम इंडियाक २५ धांवड्यांनी हारयली आनी तीन मॅचींची माळ ३-० अशी जिखली. हे माळेंत टीम इंडियाची कामगिरी सामकीच वायट आशिल्ली. भारतीय पंगड देशांत न्हय तर परदेशांत खेळटा अशें दिसतालें. २४ वर्सां उपरांत टीम इंडियाक भारतांत पयलेच खेपे क्लीन स्वीपाक तोंड दिवचें पडलें. हाचे पयलीं टीम इंडियाक २००० वर्सा दक्षीण आफ्रिके आड सगल्या मॅचींनी हारचें पडिल्लें.
टॉस जिखून पयली बॅटींग केले उपरांत न्यूझीलॅण्डान पयल्या डावांत २३५ धांवड्यो केल्यो. ताका जाप दितना भारताचो पयलो डाव २६३ धांवड्यांनी सोंपलो. ताका लागून भारताक २८ धांवड्यांची आघाडी आशिल्ली. न्यूझीलॅण्डाचो दुसरो डाव १७४ धांवड्यांनी सोंपलो आनी तांणी वट्ट १४६ धांवड्यांनी आघाडी मेळ्ळी. ते उपरांत भारता मुखार जिखपाक १४७ धांवड्यांचें लक्ष्य आशिल्लें, पूण भारतीय पंगडान १२१ धांवड्यो काडल्यो. भारता खातीर ऋषभ पंतान दुसर्या डावांत सगळ्यांत चड ६४ धांवड्यो केल्यो, जाल्यार न्यूझीलंड खातीर एजाज पटेलान सगळ्यांत चड ६ विकेटी घेतल्यो. एका वेळार भारताचे पांच खेळगडे २८ धांवड्यांचेर आवट जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
