भांगरभूंय | प्रतिनिधी
मुंबय इंडियन्सा आड हांगाच्या वानखेडे स्टेडियमाचेर कोलकाता नायट रायडर्सान झणझणीत जैत जोडलें. मिचेल स्टार्काच्यो 4 विकेटी आनी हेर बॉलरां कडल्यान मेळिल्ली साथ हाच्या नेटार कोलकाता नायट रायडर्सान 24 धांवड्यांनी जैत जोडलें. हे हारीक लागून मुंबय इंडियाचें आव्हान सोंपिल्ल्यात जमा जालां. कोलकाता नायट रायडर्सान वानखेडे मैदानाचेर वट्ट 12 वर्सांनी जैत जोडलें.
कोलकातान दिल्ली 170 धांवड्यांचे मोखीचो फाटलाव करतना मुंबय इंडियन्साचो डाव 18.5 ओव्हरींनी 145चेर सोंपलो.
ओपनर ईशान किशना वांगडा इम्पॅक्ट प्लेयर म्हणून रोहीत शर्मा बॅटिंगेक आयलो. ईशान किशन 13 आनी रोहीत शर्मा 11 धांवड्यांचेर बाद जालो. नवोदीत नमन धीराक 11 धांवड्यो करप शक्य जाल्यो. जाल्यार नेहाल वढेरा लेगीत सवाय भितर 6 धांवड्यांचेर बाद जालो. अणभवी तिलक वर्मा आनी हार्दीक पांड्या हांणी लेगीत निर्शेणी हाडली. तिलक वर्मा चाराचेर आनी हार्दीक पांड्या एक धांवडीचेर बाद जालो. अशे तरेन मुंबयची अवस्था 6 बाद 71 अशी जाल्ली. पूण, सुर्यकुमार यादवान आक्रमक बॅटींग केली. ताणें 35 बॉलांनी स चवके आनी दोन सक्यांचे मजतीन 56 धांवड्यो केल्यो. धांवगती वाडोवपाच्या यत्नांत तो बाद जालो.
सुर्यकुमारा उपरांत टीम डॅव्हिडा कडल्यान मुंबयच्या चाहत्यांक आस्त आशिल्ली. पूण तो लेगीत 20 बॉलांनी 24 धांवड्यो करून बाद जालो. ते उपरांत पियुष चावला शुन्याचेर बाद जालो. ते उपरांत मिचेल स्टार्कान कोईत्झेक बोल्ड करून कोलकाताक 24 धांवड्यांनी जैत मेळोवन दिलें.
ते आदीं कोलकाता नायट रायडर्साचो डाव 19.5 ओव्हरींनी 169चेर सोंपलो. मुंबय इंडियन्साच्या उत्कृश्ट बॉलिंगे मुखार व्यंकटेश अय्यरान खर प्रतिकार केलो आनी अखेर मेरेन खेळपट्टीचेर उबो रावलो. ताचो अर्द शेंकडो आनी ताका मनिष पांडेची मेळिल्ली साथ हाच्या नेटार मुंबय इंडियन्साक आव्हान दिवपा सारकी मोख दिवपाक कोलकातान येस मेळयलें. सुरवातीच्या टप्प्यात नुवान तुषारान जाल्यार अखेरच्या टप्प्यांत जसप्रीत बुमरान 3-3 विकेटी घेतल्यो.
कोलकाता नायट रायडर्साची सुरवात बाबत जाली. फिल सॉल्ट फकत 5 धांवड्यांचेर तंबूंत परतलो. ते उपरांत मॅचीचे तिसरे ओव्हरींत तुषारान कोलकाताक दोन धपके दिले. पयल्या बॉलाचेर सको गेल्या उपरांत दुसऱ्या बॉलाचेर अंगकृष रघुवंशीक बाद केलो. अंगकृषान 13 धांवड्यो केल्यो. ते उपरांत तेच ओव्हरीच्या निमाण्या बॉलाचेर श्रेयस अय्यराक बाद केलो. अय्यर फकत 6 धांवड्यो करपाक शकलो.
तुषारान उपरांत पांचवे ओव्हरींत मुखेली हार्दीक पांड्यान फॉर्मांत आशिल्ल्या सुनील नरेनाक 5 धांवड्यांचेर बोल्ड केलो. जाल्यार पियुष चावलान डावाते सातवे ओव्हरीच्या पयल्या बॉलाचेर रिंकू सिंगाक 9 धांवड्यांचेर स्वताचेच बॉलिंगेचेर कॅच बाद केलो.
बाबत दर्जाचे बॅटिंगेक लागून कोलकाताचो अर्दो पंगड 57 धांवड्यांचेर तंबूंत परतून गेल्लो. पूण, ते उपरांत व्यंकटेश अय्यराचो अर्द शेंकडो आनी मनिष पांडेची ताका मेळिल्ली साथ हाका लागून कोलकाताक 150 वयर मजल मारप शक्य जालें.
मनिष पांडेन 31 बॉलांनी दोन चवके आनी दोन सक्यांचे मजतीन 42 धांवड्यो केल्यो. तो बाद जाल्या उपरांत परतून कोलकाताचो डाव गडगडलो. आंद्रे रसेल 7 धांवड्यांचेर धांवबाद जालो. ताच्या फाटोफाट रमणदीप सिंग (2), मिचेल स्टार्क (0) हे दोगूय बाद जाले.
व्यंकटेश अय्यर अखेर मेरेन झूज दीत रावलो. 52 बॉलांनी स चवके आनी तीन सक्यांचे मजतीन 70 धांवड्यो केल्यो. बुमरान ताका बोल्ड करून कोलकाताचो डाव 169चेर सोंपयलो.
मुंबय इंडियन्सा वतीन नुवान तुषारा, जसप्रीत बुमरा हांणी दरेकी 3 विकेटी घेतल्यो. हार्दीक पांड्यान 2 जाल्यार पियुष चावलान एक विकेट मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
