भांगरभूंय | प्रतिनिधी
कल्याण, खबरां संस्था: कल्याण लागसारच्या गोरेगांवांत २५ लाखांचे खंडणे खातीर शेजार्यानूच एका भुरग्याचो खून केल्ल्याची घडणूक मुखार आयल्या. ही घडणूक घडटकच कांय वरांनीच पुलिसांनी दुबावीताक धरलो. ताचेर अपहरण, खंडणी आनी खुनाचो गुन्यांव दाखल केला. हें दोगां भावां सयत तांच्या कुटूंबांतल्या पांच जाणांनी मेळून केलें. सलमान मौलवी आनी ताचो भाव सफुआन मौलवी अशीं अटक केल्ल्या दोगाय भावांचीं नांवां. घर बांदपाचें काम सुरू आशिल्ल्यान तें बांदपाक पयशांची गरज आशिल्ली. हे गरजेक लागून आरोप्यांनी २५ लाखांची खंडणी मागिल्ली.
नमाजाक गेलो आनी घरा परतलोच ना
मुदासीर बुबेरे हाचो टेलरिंगाचो ल्हानसो वेवसाय आसा. ताचो ९ वर्सां पिरायेचो पूत इबाद हो यत्ता चवथेंत शिकता. रमजानाचो म्हयनो सुरू आशिल्ल्यान इबाद सदचे वरीं सांजेवेळार नमाज अदा करपाक गेल्लो. मात रात जाली तरीय तो घरा परतूंक ना. ताका लागून ताच्या घरच्यांनी ताका सोदपाचो यत्न केलो. हाचे मजगतीं इबादच्या पालकांक एक फोन आयलो. फोनार २५ लाखांच्या खंडणीची मागणी केली.
भियेल्ल्या इबादच्या पालकांनी हे विशीं पुलिसांक म्हायती दिली. तांणी रातचो उसरां मेरेन सोद घेतलो. ह्या वेळार पुलिसांक शेजराक रावपी कुटुंबियांच्या घरा फाटल्यान एके पोतयेंत इबादची कूड सांपडली.
अपहरण आनी हत्त्या प्रकरणाचो तपास करतना पुलिसांनी दुबावीत म्हणून शेजारच्या घरांतल्या कांय लोकांक ताब्यांत घेतले. तांची चवकशी केली. उपरांत त्या दोगांयनी गुन्यांव केल्ल्याचें पुलिसांक सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
