मुंबयक धनतेरस खरेदीचो अंदूं नवो विक्रम

भांगरभूंय | प्रतिनिधी

मुंबय, खबरां संस्था: अंदूं मुंबय – धनतेरस खरेदीचो अंदूं नवो विक्रम केला. कॉन्फेडरेशन ऑफ ऑल इंडिया ट्रेडर्स (CAIT) हे संस्थेच्या म्हणण्या प्रमाण भारतीयांनी धनतेरसा दिसा सुमार 1 लाख कोटी रुपया खर्च केलो. हातूंत भांगर आनी रुप्याची खरेदीचो व्हड आसपाव आशिल्लो. शेनवारा (18 ऑक्टोबर) सीएआयटीन फकत भांगर आनी रुप्याची विक्री वट्ट 60000 कोटी रुपया जाल्या अशें सांगलें, फाटल्या वर्सा परस 25% वाड़ जाली.
भारतीय रत्न आनी भांगरां परिशदेचे अध्यक्ष राजेश रोकडे हांणी, अंदूं धनत्रयोदशीक फाटल्या वर्साचे तुळेंत 10-15% उणाव जालो. मात वट्ट किमतींत नेटान वाड जाली. चड दर आसून लेगीत स्मार्ट खरेदी आनी बेगीन लग्नाची खरेदीक लागून गिरायकां उमेदी आसात. भांगराच्या नाण्यांक सगळ्यांत चड मागणी आशिल्ली.
अंदूं आतां मेरेन भांगराचे किमतींत रु. 53422 (70.14%) वाड जाल्या. 31 डिसेंबर 2024 दिसा 24 कॅरेटच्या 19 ग्रॅम भंगराची किंमत रु. 76172 आशिल्ली, जी आतां रु. 128584 वयर पावल्या.
ह्या काळांत रुप्याचे किमतींतूय रु. 83213 (96.74%) वाड जाल्या. 31 डिसेंबर 2024 दिसा एक किलो चांदीची किंमत रु. 86017 आशिल्ली आनी आतां ती रु. 1,69, 230 प्रती किलोग्रॅम जाल्या.
सीएआयटीच्या म्हणण्या प्रमाण धनतेरसाच्या दिसा आयदणां आनी रांदचे कुडींतलीं उपकरणां विभागांत 15 हजार कोटी रुपयांची विक्री जाल्ली. इलॅक्ट्रॉनिक्स वाठारांतूय सुमार 10 हजार कोटी रुपयांची विक्री जाल्या. 3 हजार कोटी रुपयांच्यो सजावटीच्यो वस्तू, दिवे आनी पुजेचें सामान विकलें. 12 हजार कोटी रुपयांचीं सुकीं खाणां, गोड जिन्नस, फळां, कपडे आनी वाहनां विकलीं.