मुंबयंतल्या गोरेगांवच्या ‘जय भवानी’ इमारतींत उजो, 6 जाणांक मरण, 50 जाण जखमी

भांगरभूंय | प्रतिनिधी

मुंबय, खबरां संस्था ः मुंबयच्या गोरेगांवच्या ‘जय भवानी’ इमारतींत उजो लागलो. हे दुर्घटनेंत सुमार 50 जाण जखमी जाले जाल्यार 6 जाणांक मरण आयलें. उजो पालोवपी दळाचे जवान उजो नियंत्रणांत हाडपाचो यत्न करतात.
गोरेगांवांत ‘जय भवानी’ पांच माळयेची इमारत आसा. थंय पार्किंग वाठारांत कपड्याची रास करुन दवरिल्ली. मध्यानरातीं 2:30 ते 3:30 च्या सुमाराक ह्या पार्किंगांत स्फोट जालो आनी कपड्याचे राशीक उजो लागलो. ल्हवू ल्हवू पुराय पार्किंग वाठारांत तो पाताळलो. उज्याक लागून पार्क केल्ल्यो 30 स्कुटरी आनी मोटारी लासल्यो. इमारतीच्या वयल्या माळयां मेरेन उज्याचो काळो धुंवर पावलो. वयर धुंवर आनी सकयल उजो हाका लागून थंय इमारतीत रावपी लोकांक भायर सरप कठीण जालें.

कांय वेळांत दुसऱ्या आनी तिसऱ्या माळ्यार उजो पावलो. मजगतीं, 3.05 वरांचेर कोणे तरी उजो पालोवपी दळाक म्हायती दिली. तेन्ना उजो पालोवपी दळान घडणुक सुवातेर धांव घेतली. काळ्या धुंवराक आनी उज्याक लागून 6 जाणांक मरण आयले जाल्यार सुमार 50 जाण जखमी जाल्यात. ताका हॉस्पिटलांत दाखल केल्यात.