भांगरभूंय | प्रतिनिधी
पणजीः फाटल्या कांय वर्सांत गोंयांत जमनीचें दर बरे आसात. हाका लागून कांय भाटकार मुंडकारांच्या घरां सयत आपलीं जमनी विकपाक लागल्यात. पूण ह्यान फुडें कायद्याप्रमाण मुंडकाराक ताच्या नांवाचेर जमीन करुन दिले बरग भाटकाराक उरिल्ली जमीन विकूंक मेळची ना अशी म्हायती मुख्यमंत्री डॉ. प्रमोद सावंत हांणी दिली. शेनवारा तांणी राज्यभरांतल्या पंचायतीं कडेन व्हर्च्युअल संवाद सादलो. ह्या वेळार तांणी म्हजे घर येवजणे विशीं म्हायती दिली.
फाटल्या तीन – चार वर्सांत मुंडकाराक हक्काची जमीन दिनासतना जमीन विकपाक लागल्या. आपलो भाटकार बदला हे मुंडकाराक खबरुच आसना. हे संबंदी मुख्यमंत्री कार्यालय, महसूल खातें आनी पुलीस खात्या कडल्यान लेखी कागाळी आयल्यात. पोरणे भाटकार गेले आनी नवो मनीस त्रास दिता अशी कागाळी येवपाक लागल्यात. ह्यान फुडें पोरणे भाटकार गेले आनी नवो आयला अशें जावचें ना. देखूनच आमी कायद्यांत हे बाबतींत कांय बदल केल्यात अशें मुख्यमंत्र्यान सांगलें.
हाचे प्रमाण, मुंडकारान मुंडकार कायद्या प्रमाण अर्ज केल्लो नासलो, पूण तो पात्र आसलो तरी लेगीत भाटकाराक मुंडकाराक ताची जमीन दिवची पडटली. भाडेकाराक लेखी स्वरुपात मुंडकाराक जमीन दिल्ल्याचे मामलेदार कार्यालयाक कळोवचें पडटलें. तेन्नाच ताका उरिल्ली जमीन विकपाक परवानगी मेळटली. हाचे भायर फुडाराक म्हजें घर खाला गृहनिर्माण मंडळा वतीन बांदिल्ल्या घरांक कायदेशीर अधिकार दिवप, गृह सोसायटी खातीर जमीन नांवाचेर करप, पंचायती वाठारांत घर परवानो आदी कामां सोंपी जातली अशेंय मुख्यमंत्र्यान सांगलें.
म्हजे घर खाला दुरुस्ती परवानो तशेंच घर क्रमांक विभागणी दिवपाची प्रक्रिया जलद केल्या. घर क्रमांक विभागणी जाले उपरांत शौचालय बांदपाची येवजण परतून सुरू करतले.
सरकारान म्हजे घर येवजण सुरू करून मूळ गोंयकारांक फायद्याचे केला. हे येवजणे प्रमाण सरकारी, कोमुनिदाद, खाजगी आनी 20 कलमी कार्यावळी खाला दिल्ले जमनीचे नियमितीकरण करतले. हाचे उपरांत जमनीच्या धनयांक रुका खाला बांदकाम नियमित करपा खातीर परवाने घेवचे पडटले अशें मुख्यमंत्र्यान सांगलें.
सनलत एकदांच मेळटली
म्हजे घर येवजणे खाला अर्ज करपाची मुजत 4 एप्रील मेरेन आसा. ही सवलत फकत एकदांच मेळटली. देखून लोकांनी मुजती भितर अर्ज करप गरजेचें. हे येवजणे आड पयशे घेवन कांय जाण न्यायालयांत वतात. पूण न्यायालयांतय आमकां येस मेळटलें असो आमकां विस्वास आसा अशें मुख्यमंत्र्यांन सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
