भांगरभूंय | प्रतिनिधी
मुख्यमंत्र्यान सादलो पंचायतीं कडेन संवाद
जमीन नांवार केले बगर उरिल्ली विकपाक मेळची ना
शौचालय बांदपाची येवजण परसून करतले सुरू
भांगरभूंय । प्रतिनिधी
पणजी : फाटल्या कांय वर्सांत गोंयांतल्या जमनींक बरें मोल आयलां. ताका लागून कांय भाटकार मुंडकारांच्या घरा सयत आपल्यो जमनी विकतात. मात हाचे मुखार मुंडकार कायद्या प्रमाण मुंडकाराक ताच्या नांवाचेर जमीन करून दिले बगर भाटकाराक उरिल्ली जमीन विकपाक मेळची ना, अशी म्हायती मुख्यमंत्री डॉ. प्रमोद सावंत हांणी दिली. शेनवारा तांणी व्हर्च्युअल पद्दतीन गोंयभरांतल्या पंचायतीं कडेन संवाद सादलो. ह्या वेळार तांणी ‘म्हजें घर’ येवजणेची म्हायती दिली.
मुख्यमंत्र्यान सांगलें, फाटल्या तीन ते चार वर्सांत मुंडकाराक हक्काची जमीन दिनासतनाच जमनी विकल्यात. मुंडकाराक आपलो भाटकार बदल्ला हें खबरूच नासता. हे विशीं मुख्यमंत्री कार्यालया सयत महसूल तशेंच पुलीस खात्यांत लेखी कागाळी आयल्यात. आदलो भाटकार गेलो आनी नवो त्रास दिता, अश्यो कागाळी येतात. हाचे मुखार आदलो भाटकार वचून नवो आयलो अशें जावचें ना. हे खातिरूच आमी हे विशींच्या कायद्यांत कांय बदल केल्यात.
ते प्रमाण मुंडकारन मुंडकार कायद्या प्रमाण अर्ज करूंक नासतलो, पूण तो पात्र आसतलो, भाटकाराक मुंडकाराक ताची जमीन दिवचीच पडटली. भाटकाराक लेखी स्वरुपांत मुंडकाराक जमीन दिल्ल्याचें मामलेदार कार्यालयांत कळोवचें पडटलें. ते उपरांतूच ताका उरिल्ली जमीन विकपाची परवानगी मेळटली. ते भायर येता त्या काळांत ‘म्हजें घर’ येवजणे खाला गृहनिर्माण मंडळा वतीन बांदिल्ल्या घरांक कायदेशीर अधिकार दिवप, हावसींग सोसायटीं खातीर जमीन नांवाचेर करप, पंचायत वाठारांत घर परवानो ह्यो गजाली सुटसुटीत जातल्यो, अशें मुख्यमंत्र्यान सांगलें.
‘म्हजें घर’ येवजणे खाला घर दुरुस्ती परवानो तशेंच घर नंबर विभागणी दिवपाची प्रक्रिया जलद केल्लया. घर नंबर विभागणी जाले उपरांत शौचालय बांदपा खातीरची येवजण परतून सुरू करतले, अशेंय मुख्यमंत्र्यान सांगलें. सरकारान ‘म्हजें घर’ येवजण सुरू करून मूळ गोंयकारां वयली हुमकळपी तरसाद पयस केल्या. येवजणे प्रमाण सरकारी, कोमुनिदाद, खाजगी आनी 20 कलमी कार्यावळी खाला दिल्ली जमीन नियमीत करतले. ते उपरांत जमीन धनयांक रुका खाला बांदकाम नियमीत करपाक परवाने घेवचे पडटले, अशें मुख्यमंत्र्यान स्पश्ट केलें.
सवलत एकदांच मेळटली
‘म्हजें घर’ येवजणे प्रमाण अर्ज करपा खातीर 4 एप्रील मेरेन मुजत आसा. ही सवलत एकदांच मेळटली. ताका लागून लोकांनी दिल्ले मुजती भितर अर्ज करप गरजेचें आसा. येवजणेचे आड कांय जाण पयशे घेवन न्यायालयांत वतात. मात आमकां न्यायालयांत लेगीत येस मेळटलें अशी आस्त आसा, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
