मुंडकारांक जमनीचो हक्क मेळ्ळ्या खेरीत भाटकारांक जमीन विकपाचेर बंदी

भांगरभूंय | प्रतिनिधी

-विधेयक सादर करपाचो सरकाराचो प्रस्ताव

पणजी : कूळ वा मुंडकारांक तांचो हक्क मेळपा पयली संबंधीत भाटकाराक जमीन विकपाक बंदी घालपाची तजवीज करपाचो विचार आसा. हे विशींचे विधेयक अधिवेशनांत सादर करपाचो प्रस्ताव आसा. येणावळ खात्याच्या अधिकाऱ्यां कडल्यान ही म्हायती मेळ्ळी.

मंत्रीमंडळान मसुद्याक मान्यताय दिल्या उपरांत विधेयकाचो मार्ग मेकळो जातलो. राज्यांत तरेकवार न्यायालयांत 2 हजारा वयर मुंडकारांचे खटले प्रलंबीत आसा. न्यायालयांत खटले प्रलंबीत आसतनाच काय भाटकारानी जमनी विकपाक सुरवात केल्या. हाका लागून मुंडकारांक कायद्या प्रमाण जमीन मेळपाक आडखळी येवपाक लागल्या. ही गजाल मतीत घेवन हाचेर उपाय काडपाचे येत्न सुरू आसा. मुंडकारांच्या खटल्याचेर जो मेरेन निर्णय जाय ना, तो मेरेन भाटकाराक जमीन विकपाक मेळची ना. हाचे खातीर भूंय महसूल कायद्यात दुरूस्ती करची पडटली. हाचे खातीर विधेयक तयार जातलें.

काय मुंडकारांनी जमिनीचेर दावो लेगीत करूंक ना. अशा मुंडकारांक थाकाय मेळटली. प्रलंबीत आशिल्ले कूळ/मुंडकार खटले निकालांत काडपा खातीर सरकारान खासा मामलेदारांची वेवस्था केली. सुटयेच्या दिसा लेगीत सुनावणी घेवपाचे आदेश दिले. तरी लेगीत 2 हजारा वयर मुंडकारांचे खटले प्रलंबीत आसा. खटले प्रलंबीत आसतना काय भाटकार जमनी विकपाक लागल्या. हो प्रकार सरकारच्या लक्षात आयिल्ल्यान आतां हाचेर बंदी हाडपी कायदो तयार जातलो.