भांगरभूंय | प्रतिनिधी
मडगांव: मुंगूलच्या गँगवॉर प्रकरणांत फरारी जाल्ल्या दुबावितांक पळून वचपाक मजत केल्ल्याच्या आरोपा खाला अटक केल्ल्या परशुराम राठोड हाका सशर्त जामीन मंजूर जालो. ह्याच प्रकरणांत दुबावीत दीपक कट्टीमणी हाकाय सशर्त जामीन मेळिल्लो.
दुबावीत परशुराम राठोड हाणें मुखेल आरोपी अविनाश गुंजीकर, इम्रान बेपारी, अक्षय तलवार आनी मुहंमद ताहीर हांकां गंभीर गुन्यांवांत वाटेकार आशिल्ल्याचें खबर आसूनय गोंयच्या पळून वचपाक मजत केली. उपरांत तांकां यारगट्टी, कर्नाटकच्या लॉजांत रावपाची वेवस्था करून दिली. ह्या काळांत तो सेगीत तांच्या संपर्कांत आशिल्लो, असो आरोप पुलिसांनी ताचेर दवरिल्लो.
जामिना खातीरच्यो अटी
परशुराम राठोडान 4 सप्टेंबराक न्यायालयांत जामिना खातीर अर्ज सादर केल्लो. न्यायालयान 25 हजारांचो वयक्तिक बॉंड, तितलेच किमतीचे दोन हमीदार, दर म्हयन्याच्या दुसर्या आनी चोवथ्या शेनवारा फातोर्डा पुलीस स्टेशनांत हाजेरी लावप, मोबायल नंबर आनी नामो जमा करप, साक्षीदारांचेर चेंपण हाडप ना, पुराव्यां कडेन फटींगपणां करचीं न्हय, परवानगे बगर देश सोडून वयचें न्हय, अश्या अटींचेर ताका जामीन मंजर केला.
हेर दोन आरोपींचे जामीन मारले भायर
मजगतीं, ह्याच गँगवॉर प्रकरणांतलो दुबावीत अमोघ नायक हाणें दक्षीण गोंय जिल्लो सत्र न्यायालयांत दाखल केल्लो अटकपूर्व जामिनाचो अर्ज भायर मारला. तशेंच आनीक एक दुबावीत सुरज मांझी हाणें अटक जाले उपरांत 30 ऑगस्टाक जामिना खातीर केल्लो अर्जूय न्यायालयान नामंजूर केला.
ह्या प्रकरणांत फातोर्डा पुलिसांक आतां मेरेन 25 दुबावितांक अटक केल्या. ह्या प्रकरणांतल्या आनीक कांय दुबावितांक बेगीनूच अटक करतले, अशी म्हायती दक्षीण गोंय पुलीस अधीक्षक टिकमसिंग वर्मा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
