भांगरभूंय | प्रतिनिधी
मडगांवः कोलवा सावन येवपी मोटारीक मुंगुल हांगा आडोवन बडी, तलवार आनी कोयत्यान हल्लो केल्ल्यान दोगांची भलायकी गंभीर आसा. सुरवेच्या चवकशे प्रमाण, ही घडणूक दोन गटां मदल्या आदले दुस्मानकायेक लागून जाल्या. दक्षीण गोंय पुलीस अधीक्षकांच्या फुडारपणा खाला पांच पंगड तयार करुन पांच दुबावितां आड लुकआवट नोटीस काडल्या. कांय जाणांक चवकशी खातीर ताब्यांत घेतल्यात.
माडेल वाठारांत मंगळारा फांतोडेर 4.30 वरांच्या सुमाराक जाल्ल्या हल्ल्यांत दोग तरणाटे गंभीर जखमी जालें. ६ ते ७ जाणांनी वांगडा येवन ताची मोटार आडोवन रफीक ताशान (24) आनी युवकेश सिंग (20) हांचेर बडी, तरसाद आनी कोयत्यान हल्लो केलो. स्वताची राखण करपा खातीर तरणाट्यांनी गाडयेचीं दारां भितरल्यान बंद केली. पूण हल्लेखोरांनी तांचे गाडयेचेर फारपेट केलो. घडणूके उपरांत दुबावितांनी पळ काडलो. फातोड्डें पुलिसांक तपासा वेळार घडणूक सुवाते वयल्यान बंदुकेच्या सेल सयत एक गुळी मेळ्ळी.
दोगूय जखमींचेर जीएमसींत उपचार चलतात. दनपारां पुलिसां सयत फॉरेन्सिक पंगडान थळार वचून तपासणी करून गरजेचे पुरावे एकठांय केले. दक्षीण गोंय जिल्लो पुलीस अधीक्षक टिकम सिंगाच्या मार्गदर्शना खाला पांच पंगड तयार केल्यात आनी सीसीटीव्ही फुटेज आनी हेर पुराव्यां वरवीं तपास सुरू आसा. फातोड्ड्यां पुलिसांनी कांय जाणांक चवकशी करपा खातीर ताब्यांत घेतल्यात. पूण अजून कोणाक अटक जावंक ना अशें तांणी सांगलें.
परवानो नासतना बंदूकीचो वापर, गुन्यांव नोंद
खून करपाचो यत्न, गुन्यांव करप, जखमी करप, धारदार शस्त्रां वापरप, आडावप, मालमत्तेचें लुकसाण करप, धमक्यो दिवन मारपेट करप, परवानो नासतना बंदूक वापरप अशा कलमा खाला गुन्यांव नोंद केलां. ह्या प्रकरणांतल्या दुबावितां कडेन बंदूक कशी आयली हाची चवकशी सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
