भांगरभूंय | प्रतिनिधी
मडगांव : मुंगुल गँगवॉर प्रकरणांत जॉयस्टन फर्नांडीस (20) हाचे उपरांत फातोड्डें पुलिसांनी दुबावीत अक्षय तलवार, इम्रान बेपारी, अविनाश गुंजीकर, परशुराम राठोड, दीपक कट्टिमणी हांकां अटक केली. आतां मेरेन ह्या प्रकरणांत 15 जाणांक अटक केल्या. आजून कांय जाणांक अटक जावपाची शक्यताय आसा.
मुंगुल गँगवॉर घडणुकेंत फातोड्डें पुलिसांनी बिरेस्तारा सुनील बिलावर (20, घोगळ, मडगांव) हाका अटक केल्ली. हाचे उपरांत आतां पर्वरी पुलिसांनी ह्या प्रकरणांतलो दुबावीत जॉयस्टन फर्नांडीस (20) हाका अटक केली. दुबावितान हल्ल्यांत वापरिल्ली गाडीय पुलिसांनी जप्त केली. जाल्यार हाचे आदीं अटक केल्ले आठ जाण पुलीस कोठयेत आसात.
मुंगुल मॉडेल वाठारांत गाडी आडोवन तलवार, कोयतो आनी सोडाच्यो बाटल्यो वापरून केल्ल्या हल्ल्यांत रफीक ताशान (24) आनी युवकेश सिंग बडैला (20) गंभीर जखमी जालें. हल्ल्या वेळार फाटपेटूय केलो. दक्षीण गोंय पुलिसांनी पांच दुबावितां आड लुकआउट नोटीस काडल्या. हाचे आदीं दुबावीत विल्सन कार्व्हालो, शाहरुख शेख (दवर्ले), रसूल शेख (मडगांव), मोहम्मद अली (24), वासू कुमार (24), सूरज माझी (19), मलिक शेख (18), गौरांग कोरगांवकार (24) हांकां अटक केल्ली. आठूय दुबावितांक न्यायालयांत हजर केले उपरांत सोमारा मेरेन पुलीस कोठी दिली. ह्या प्रकरणांत आनीक कांय जाणांक अटक जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
