भांगरभूंय | प्रतिनिधी
नवें अॅप सुरू: केंद्राच्या, राज्याच्या येवजण्यांची म्हायती मेळोवंक येतली
पणजी: गोंयकारांक मुख्यमंत्री डॉ. प्रमोद सावंत हांच्या संपर्कांत रावंक मेळचें हे खातीर सरकारान ‘आमचो दोतोर’ हें नवें अॅप सुरू केलां. हें अॅप स्वताच्या मोबायलार डावनलोड करून लोकांक केंद्र आनी राज्य सरकाराच्यो विवीध येवजण्यो, नोकरेच्यो संदी तशेंच हेर म्हायती मेळोवंक येतली.
राज्याच्या मुख्यमंत्रीपदाचीं सुत्रां हातांत घेवन सावन मुख्यमंत्री डॉ. प्रमोद सावंत सेगीत लोकांच्या संपर्कांत आसतात. गांवगिऱ्या वाठारांतले लोकांचे विवीध प्रस्न रोखडेच सुटावे जावचे हे खातीर कांय म्हयन्यां पयलीं हेल्पलायन क्रमांक जारी केल्लो. उपरांत दूरदर्शनाचेर ‘हॅलो गोंयकार’ ही कार्यावळ दर शुक्रारा आयोजीत करताले. हे कार्यावळी वरवीं मुख्यमंत्री डॉ. प्रमोद सावंत थेट लोकांचे प्रस्न, समस्या आयकून घेवन ताचेर रोखडोच उपाय काडपाचे निर्देश संबंदीत खात्यांच्या अधिकाऱ्यांक दिताले.
ही कार्यावळ सगले सरकारी खात्यांचे अधिकारी पळयताले. ताका लागून लोकांनी मुख्यमंत्र्यां कडेन मांडिल्ले प्रस्न सोडोवपा खातीर तांचे कडल्यान रोखड्योच हालचाली सुरू जाताल्यो. थोड्याशा काळा भितर हे कार्यावळीक बरो प्रतिसाद मेळिल्लो.
मजगतीं, ‘हॅलो गोंयकार’ उपरांत आतां लोकांक थेट मुख्यमंत्र्यांच्या संपर्कांत हाडपा खातीर ‘आमचो दोतोर’ नांवान नवें अॅप सुरू केलां. हें अॅप मोबायलार डावनलोड करून लोकांक थेट मुख्यमंत्री डॉ. सावंत हांच्या संपर्कांत रावंक मेळटलें. ह्या अॅपा वरवीं केंद्र आनी राज्य सरकाराच्या विवीध येवजण्यांची म्हायती मेळोवंक येतली. तशेंच नोकरेचे संदी सयत राज्यांतली म्हत्वाची म्हायती लेगीत ह्या अॅपा वरवीं लोकांक मेळोवंक येतली.
गांवांनी आनी शारांनी रावपी गोंयच्या लोकांचे दरेक प्रस्नाचेर मात करपाचे यत्न मुख्यमंत्री डॉ. प्रमोद सावत हांच्या फुडारपणा खालचे सरकार करीत आसा. तशेंच केंद्र आनी राज्य सरकाराच्यो येवजण्यो तळागाळा मेरेन पावोवन गांवगिऱ्या वाठारांतल्या लोकांक ताचो लाव मेळोवन दिवपाचें काम प्रशासना कडल्यान सुरू आसा. ते खातीर ह्या अॅपाच्या माध्यमांतल्यान अशा येवजण्यांची म्हायती दिवपाची वेवस्थाय केल्ल्याचें सरकारी गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
