भांगरभूंय | प्रतिनिधी
मीस युनिव्हर्स गोवाची संचालिका जिया पाटील हांचो उलो
पणजीः गोंय राज्यांत मीस युनिव्हर्स खातीर पयलेच खेपे ओडीशन जाता. हें ओडीशन सगल्या बायलां खातीर कसलेच पिरायेचे मर्यादे बगर उक्ती आसा. हे संदीचो गोंयच्या बायलांनी लाव घेवचो आनी तांकां आमी संसारीक माचये खातीर तयार करतले, अशें मीस युनिव्हर्स गोंय आनी मीस टीन गोंयच्यो संचालक जिया पाटील हांणी सांगलें.
पणजे आपयिल्ले पत्रकार परिशदेंत नामनेची मॉडेल जिया पाटील उलयताली. ह्या वेळार भालचंद्र आमोणकार हाजीर आशिल्ले.
मीस युनिव्हर्स गोंय आनी मीस टीन गोंय हे दोनय अधिकृत मीस युनिव्हर्स हे संघटणे खाला येता. राष्ट्रीय संचालक निखील आनंद हांच्या फुडारपणा खाला फाटल्या दोन वर्सा मीस युनिव्हर्सचे अधिकृत राष्ट्रीय पेन्टन आमचे कडेन आसा, अशें पाटील हांणी सांगलें.
गोंयांत खूब जाणां कडेन प्रतिभा आसा. पूण लोकांक तांची जाणविकाय ना. देखून मीस युनिव्हर्स इंडिया हांणी गोंयांत ओडीशन घडोवन हाडपाचें थारयलां. मीस युनिव्हर्स गोवा आनी मीस टीन गोवा ह्या दोन सर्ती खातीर ओडीशन जातलें. मीस युनिव्हर्स गोवा आनी मीस टीन गोवा किताब जिखपी राष्ट्रीय मायचेर सुवात मेळटली. राष्ट्रीय सर्त जिखले जाल्यार तांकां मीस युनिव्हर्स हे अंतरराष्ट्रीय सर्ती खातीर भारताचे प्रतिनिधित्व करपाची संद फावो जातली, अशी म्हायती पाटील हांणी दिली.
मीस टीन गोवा ही श्रेणींत पिराय मर्यादा ही 13 ते 19 वर्सा मजगतीं आसा. शाळेंत आनी म्हाविद्यालयांनी वचपी चलयो हातूंत वांटेकार जावं येता. जाल्यार मीस युनिव्हर्स हे श्रेणींत चडांत चड पिराय मर्यादा काडून उडयल्या. 18 वर्सा पिराये वेल्या खंयचेय बायलेक हातूंत वांटेकार जावं येता. आंकवार वा लग्न जाल्ली, काम करपी, घर सांबाळपी खंयचीय बायल आसूं, जर तिचे कडे प्रतिभा आनी स्वप्न आसा तांणी हे माचयेर येवचें, असो उलो पाटील हांणी मारला.
ही सर्त 28 एप्रीलाक सकाळीं 9.30 वरां सावन कांदोळे होटॅल नोवोतेल हांगासर जातली. इत्सुकांनी हे सर्ती खातीर ऑनलायन नोंदणी करची. मीस युनिव्हर्स इंडिया मनिका विश्वकर्मा ह्या सर्तीचें परिक्षण करतली, अशें आमोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
