भांगरभूंय | प्रतिनिधी
मुंबय : मनोज सानेच्या जबानींतल्यान मीरा रोड खून प्रकरणांत नवी म्हायती भायर सरत आसा. सरस्वती वैद्य हिका मारतकच तो चार दीस तिचे कुडीचो विलो लायतालो. तिचे कुडीचे ताणें फोटोय काडल्यात. तिका घरांत पडून मरण आयलें, अशें ताणें पुलिसांक सांगलां.
कुडीचो विलो कसो लावप हें ताणें गुगलाचेर सर्च केलें. सरस्वतीच्या मोबायलांतलो सगलो मजकूर डिलीट केला. कूड कापपाक ताणें इलेक्ट्रीक कटर विकत हाडलो. घाण येवची न्हय, म्हूण कितें करचें तें गुगलाचेर सोदलें. सध्या तो पुलिसांनी दिशाभूल करपी म्हायती दिता. ती आपणाक चलये सारकी म्हणटा. आपणाक व्हडलें दुयेंस जालां. ताका लागून शरीरसंबंद जावंक ना अशें तो पुलिसांक सांगता. सरस्वती ही मनोजा वांगडा रावचे पयलीं एका अनाथ आश्रमांत रावताली. थंय तिणें ताची वळख आपलो मामा अशी करून दिल्ली.
सरस्वती अनाथ आसा अशें तो सांगतालो. मात आतां सरस्वतीच्या आदार कार्डा वयल्यान पुलिसांनी तिच्या तिगी भयणींक सोदून काडलीं. तीं मुंबयंतूच रावतात. तांकां हत्येची खबर सोशल मिडियाचेर कळिल्ली. मनोज साने हो बोरिवली एके धान्य सोसायटींत अर्दवेळ पांच हजार रुपयांक काम करतालो. बोरिवलेच्या घराचे ताका 35 हजार भाडें मेळटालें. मात तो रिणांत आसा. सोसायटीचे पयशे भरपाक ताणें रिणूय काडलां, अशें ताणें पुलिसांक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
