भांगरभूंय | प्रतिनिधी
भांगरभूंय । प्रतिनिधी
काणकोणः श्रीस्थळ काणकोण हांगचो आनी गालजीबागच्या श्रद्धानंद प्राथमीक विद्यालयात पयले यत्तेंत शिकपी मिहिर चिन्मय आमशेकार हाणे श्रृंगेऱी मठांत पुराय भगवद्गगीता तोणपाठ म्हणून दाखयल्ले खातीर श्रृंगेरीच्या शंकराचार्यांनी ताका 21 हजार रुपये आनी प्रमाणपत्र दिवंन ताचो भोवमान केलो. फाटल्या 3 मार्चाक ही कार्यावळ जाली. आमच्या आमशेकार कुटूंबांत आतां मेरेन स जाणांनी संस्कृत भारतीचे चिन्मय आमशेकार हांच्या मार्गदर्शना खाला अशे पुरस्कार मेळयल्यात अशें जितेंद्र आमशेकारान सांगलें.
कर्नाटकांतलो श्रृंगेरी मठाचे शंकराचार्य दर म्हयन्याक गीता पठण परिक्षा घेतात. वर्साक सुमार दोनशें विद्यार्थी हे परिक्षेक बसतात. जात-पात, पिराय, लींग भेद पाळनासतना ही परिक्षा दिवपाक मेळटा. मल्लिकार्जुन देवस्थान समितीचो अध्यक्ष विठोबा देसाय, शिक्षिका संपदा प्रभुदेसाय आनी पालक-शिक्षक संघान मिहिराक परबीं भेटयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
