भांगरभूंय | प्रतिनिधी
गोंय राज्य प्रदुशण नियंत्रण मंडळाची कारवाय
भांगरभूंय । प्रतिनिधी
मडगांव : सोनसडो कोयर यार्डांत मिश्र कोयर घालून ताचेर मातयेचो भराव घातिल्ल्याचो प्रकार उजवाडाक आयलो. ते उपरांत गोंय राज्य प्रदुशण नियंत्रण मंडळान पळोवणी लेगीत केल्ली. आतां पर्यावरण संरक्षण कायद्या खाला कायवाय कित्याक करची न्हय, हे विशीं स्पश्टीकरण दिवचें, अश्या आशयाची नोटीस मंडळान मडगांव पालिका मुख्याधिकाऱ्याक धाडल्या.
मडगांव पालिकेन सोनसड्या वयल्या कोयर यार्डांत सुमार 20 टन वर्गिकरण करूंक नाशिल्लो आनी सॅनिटरी पॅड तशेंच हेर मिश्र घनकोयर उडयलो आनी ते उपरांत त्या कोयराचेर मातयेचो भराव घालताले. हे संबंदांत गोंय राज्य प्रदुशण नियंत्रण मंडळाचे हालींच केल्ले तपासणी उपरांत ही नोटीस धाडली. पालिके कडल्यान जर समाधानकारक जाप मेळ्ळी ना जाल्यार मंडळ फुडली कसलीच सुचोवणी दिनासतना, पर्यावरण (संरक्षण) कायदो, 1986 खाला कायदेशीर कारवाय करतले, अशें प्रदुशण नियंत्रण मंडळाचे अध्यक्ष लेविन्सन मार्टिन्स हांणी नोटिशेंत नमूद केलां.
मिश्र कोयराचो अशे तरेन विलो लावप हें घनकोयर वेवस्थापन नेम, 2016 मोडप. ह्या प्रकाराक लागून पर्यावरणाक धोको निर्माण जाता. सोनसडो कोयर यार्डांत उडयिल्लो कोयर तत्काळ वेगळो करून काडपाचो आनी ताची विज्ञानीक पद्दतीन विलो लावपाचे निर्देश दिल्यात.
सॅनिटरी पॅड आनी हेर कोयराचो विलो कुंडयच्या बायोमॅडिकल कोयर प्रक्रिया सुविधेंत लावचो. सॅनिटरी कोयरा सयत मिश्र कोयर उडोवपाचें बंद करचें. सॅनिटरी कोयराच्या विल्या संबंदांतले पालिकेचे नोंदीची पडटाळणी करचे खातीर कुंडयच्या बायोमॅडिकल कोयर प्रक्रिया सुविधेंत धाडिल्ल्या सॅनिटरी आनी घरगुती जैवीक- घातक कोयराच्या प्रमाणाचो म्हयन्या प्रमाण तपशील सादर करचो. जे सुवातेर कोयर उडयला, ती जशी आशिल्ली ते स्थितींत हाडची, अशेंय मंडळान निर्देश दिल्यात. हे संबंदांत सात दिसां भितर अनुपालन अहवाल सादर करप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
