भांगरभूंय | प्रतिनिधी
पेडणें: मिशन फॉर लोकलान पेडणें वतीन येवपी जिल्लो पंचायत वेंचणूक लढोवपाचो निर्णय घेतला. मिशनचे कोअर समितीचे बसकेंत हो निर्णय घेतलो. पेडणें मतदारसंघांतल्या तोर्से, धारगळे आनी हरमल ह्या तीन जिल्लो पंचायत मतदारसंघांत उमेदवार देंवोवपाचें थारलां.
पेडणें मतदारसंघांत फाटल्या तीन वर्सां सावन मिशनाचें काम सुरू आसा. मगोचे फुडारी राजन कोरगांवकार हांणी ही संकल्पना मुखार हाडल्या.
थळाव्यांक स्वावलंबी करून आत्मनिर्भरतेक उर्बा दिवपा खातीर मिशनाचें काम सुरू आसा. पेडणेंकरांक तांचे तांकीची आनी कामाचे तांकीची वळख करून दिवप हो ताचे फाटलो मुखेल हेतू. फाटले विधानसभा वेंचणुकेंत राजन कोरगांवकार हांणी मगो वतीन वेंचणुकेंत देंवून वट्ट ९ हजार ६०० मतां मेळयिल्लीं. पेडणेंच्या खंयच्याय एका भूंयपुतान आतां मेरेन मेळयिल्लें हें सगळ्यांत उत्कृश्ठ मतदान थारिल्लें. मगो- भाजप युती जाले उपरांत राजन कोरगांवकार हांणी मिशन फॉर लोकल, पेडणें वतीन आपले काम चालूच दवरलां.
पेडणें मतदारसंघांतल्या थळाव्यांच्या नेतृत्वाक उर्बा दिवपा खातीर मिशन फॉर लोकल, पेडण्यां वतीन जिल्लो पंचायत वेंचणूक लढयतले. तशेंच पेडणें नगरपालिका वेंचणुकेंतूय मिशना वतीन उमेदवार देंवोवपाचो निर्णय कोअर समितीचे बसकेंत जालो. जिल्लो पंचायती खातीर उमेदवार चाचणी सुरू आसा. मिशनाचे उमेदवार वेंचून आयल्यार जिल्लो पंचायत वांगड्यां सयत थळाव्यांचे विवीध विशय सोडोवपा खातीर मिशन सहकार्य करतले अशेंय राजन कोरगांवकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
