भांगरभूंय | प्रतिनिधी
पणजी: मिरामार वसणुकेंत गॅस चोरी प्रकरणांत दोगांक थळाव्यांनी धरले. उपरांत आपलीं फटींगपणां उक्तीं जाल्ल्याचें कळटकच ते दोगूय थंयच्यान पळून गेले. भारत पेट्रोलियमचो बीपी गॅस जो हॉटेला खातीर वापरतात, ताची किंमत सध्या १८०० रुपया आसा.
नेमकें प्रकरण कितें?
एक ट्रस मिरामार सदांच उबो आसता. दोन वरां परस चड वेळ उबो आशिल्ल्यान थळाव्यांनी ड्रायव्हर आनी क्लिनराक विचारलें. तेन्ना तांणी सांगलें, आमी हॉटेलांत गॅसीची डिलीवरी करपाक हांगा रावतात आनी बील करपाक कळाव जाता. काल सकाळीं त्या ट्रकांत कितें तरी गडबड चलिल्ल्याचें थळाव्यांक समजलें. देखून एकल्यान तांचो व्हिडियो काडलो. व्हिडियोंतल्यान अजापाची गजाल लक्षांत आयली. त्या ट्रकांत रिकामो गॅस सिलेंडर आडवो आशिल्लो आनी भरिल्लो सिलेंडर ताचे मुखार आडवो आशिल्लो. भरिल्ल्या सिलेंडरांतल्यान बारीक वायरींतल्यान गॅस रिकाम्या सिलेंडरांत भरपाचो प्रकार चलिल्लो पळोवपाक मेळ्ळो. रिकामो सिलेंडर भरून जाले उपरांत ताका हळदुव्या रंगाचें सील मारतना ते दोगूय दिसले. फोटवांत हें स्पश्टपणान उक्तें जालें.
हो प्रकार पळोवन एका थळाव्यान तांकां, ‘तुमी हांगा हें कितें करतात?’ असो प्रस्न केलो. ड्रायव्हर भियेलो आनी घुस्पल्ले वरीं जापो दिवपाक लागलो. आमचो व्हिडियो काडूं नाका, अशें म्हणपाक लागलो. तांचेच मुखार जेन्ना थळाव्यांनी पुलिसांक फोन केलो तेन्ना ड्रायव्हर आनी क्लीनर सिलेंडर थंय सोडून पळून गेले. तांचे कडली वायर तांणी थंयच कुशीक भिरकायली. सिलेंडर उक्तोच आशिल्ल्यान तातुंतली गॅस हवेंत मिसळटाली. स्फोट जाल्लो जाल्यार कितें जावपाचें, असो प्रस्न थळाव्यान उपस्थित केला.
हे गजालीक जापसालदार कोण?
१. गॅसीची गाडी दोन ते तीन वरां एकेच सुवातेर येवन उबी आसता, मात कंपनी ताची फाटपुरवण करिना.
२. कंपनी कडल्यान सिल केल्ले स्टिकर ड्रायव्हरा कडेन कशे?
३. वजनाचो कांटो गाडयेंत आशिल्लो, मात गॅस घेतना गिरायक खंयचे तागडेंत वजन तोलताले?
४. वजन माप खातें खंय आसा?
५. जांचे कडेन एजन्सी आसा तांचो रोल कितें?
ह्या प्रकारा उपरांत अशे जायते प्रस्न मुखार आयल्यात.
ते पळून गेल्ले दोगूय खंयच्या रॅकेटांतले बी आसात जाल्यार हाची चवकशी जावपाची गरज आसा. तशेंच गिरायकांनी सावधान रावपाची गरज आसा, अशें मिरामार वसाहतींतल्या लोकांनी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
