भांगरभूंय | प्रतिनिधी
भांगरभूंय । प्रतिनिधी
पणजीः मिरामार रेसिडेन्सी हॉटेल दीर्घकाळा खातीर लिजार दिवपाक समाज वावुरप्यांनी खर विरोध केलां. हें हाॅटेल दिल्लीकारांक दिवचे परस गोंय सरकारानूच हे चलोवचें जाका लागून गोंयच्याच भुरग्यांक रोजगार मेळटलो, अशी मागणी समाज वावुरप्यांनी करून हे विशींचे निवेदन गोंय पर्यटन उदरगत म्हामंडळाक भेटयलें.
समाज वावुरपी संजय बर्डे, शंकर पोळजी, रामा काणकोणकार आनी सितेश मोरे हांणी गोंय पर्यटन उदरगत म्हामंडळाचे अध्यक्ष तशेंच वेवस्थापकी संचालकाक निवेदन भेटयलें.
निवेदन भेटयले उपरांत उलयतना संजय बर्डे हांणी सांगले, गोंय पर्यटन उदरगत महामंडळ (जीटीडीसी) हांचेनी मिरामार रेसीडेन्सी ही मालमत्ता 40 वर्सा खातीर खाजगी कंपनीक लीजार दिलां.
हे मालमत्तेचें मोल एक हजार कोटी रुपयां परस आसा. सरकाराचोच काळ पाच वर्सा मेरेन आसता. देखून 40 वर्सा इतले व्हडले काळा खातीर लीजार दिवन सरकार दिल्लीकारांची बोल्सा कित्याक भरता. सरकारी आपली मालमत्ता भायल्यांक विकता आनी ते आपल्या पिळगे खातीर जोडून काडटांत, असो आरोप बर्डे हांणी केलो.
हो खरो विशय विरोधकांनी काडपाक जाय आसलो. पूण फकत समाज वावुरपी हे विशय काडटात ही व्हडली लज विरोधी आमदारांक नासची ना. गोंयचे सगळे विरोधी आमदार सत्ताधारी आमदारा बरोबर हात मेळून आसात. जर विरोधी आमदारांक कापास्दाद आसा जाल्यार तांणी हो विशय विधानसभेत काडचो, अशें आव्हान बर्डे हांणी केलें.
पणजे मांडवी न्हंयेंची जेटी ते मिरामार मेरेनची सगळी संपत्ती सरकारान भायल्यांक लीजार दिल्या. सरकारान स्वता मिरामार रेसिडेन्सी हॉटेल बांदचे आनी गोंयकार आसात तांका नोकऱ्यो दिवच्यो. राज्याचें बजेट 30 हजार कोटीचें आसा तातुंतले एक हजार कोटी वापरून सरकार आपली मालमत्ता आपूण जावन कित्याक बांदपाक शकना, असो प्रश्न रामा काणकोणकार हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
