भांगरभूंय | प्रतिनिधी
पणजी : ला कांपाल कॉलनी – मिरामार बिरेस्तारा सकाळीं एका घराक उजो लागलो. पणजी उजो पालोवपी दळान बेगोबेग उजो नियंत्रणांत हाडिल्ल्यान व्हड अरिश्ट जावपा पसून वाटवलें. हातूंत सुमार 2 लाख रुपयांचें लुकसाण जाल्ल्यान 10 लाख रुपयांची मालमत्ता वाटावपाक दळाक येस आयलें. पणजी पुलिसांनी घडणुकेची नोंद केली.
हे विशीं उजो पालोवपी दळान दिल्ले म्हायती प्रमाण, बिरेस्तारा, 23 आक्टोबराक सकाळीं 5.18 वरांचेर मिरामारच्या ला कांपाल कॉलनींतल्या एका घराक उजो लागिल्ल्याची म्हायती उजो पालोवपी दळाच्या नियंत्रण कक्षाक मेळिल्ली. ही म्हायती कक्षान पणजी उजो पालोवपी दळाक दिली. ते प्रमाण, पणजी फायर स्टेशन ऑफिसर रुपेश सावंत हांच्या मार्गदर्शना खाला लिडींग फायर फायटर येसो आमोणकार, ड्राइव्हर ऑपरेटर जितेंद्र मयेंकार, फायर फायटर दिप्तेश पै, ओंकार राणे, मंजुनाथ होसमानी आनी हेर जवान घडणुके सुवातेर पावले. उपरांत उजो हेर सुवातांचेर पातळची न्हय म्हणून आनीक मजत मागयली. मजगतीं ते प्रमाण मुख्यालयाचो एक बंब घडणुके सुवातेर दाखल जालो.
उजो पालोवपी दळान रोखडेंच उज्याचेर नियंत्रण मेळयल्ल्या व्हड लुकसाण जावपा पसून वाटवलें. ह्या वेळार ह्या घराचेर एके कुडीक उजो लागिल्लो. हो उजो सकाळीं 7.57 वरांचेर नियंत्रणांत हाडलो. घरांतलें 2 लाख रुपयांचें लुकसाण जालें, जाल्यार दळाक 10 लाख रुपयांची मालमत्ता वाटावपाक येस आयलें. हो उजो शॉर्ट सर्किटाक लागून लागिल्लयाची शक्यताय उजो पालोवपी दळान उक्तायली. ह्या प्रकरणांत पणजी पुलिसांनी उज्याची घडणूक म्हणून नोंद करून कारवाय सुरू केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
