भांगरभूंय | प्रतिनिधी
आयज जातली कामाक सुरवातः काम बंद उडोवपाची शिटकावणी
भांगरभूंय । प्रतिनिधी
सांगें : मिराबाग सांवड्ड्यां बांदपा आशिल्ल्या बांदाक पुराय विरोध आसा, अशें थळावे पंच संजय नायक हांणी सांगलें. मिराबाग सांवड्डेंच्या श्रीकृष्म देवळा लागसार धेतिल्ले बसकेंत ते उलयताले. ह्या वेळार तांचे वांगडा उत्तम नायक, आपा नायक, सत्यवान नायक, दयानंद लाडी, प्रकाश नायक आनी गांवांतले सुमार 95 टक्के लोक हाजीर आशिल्ले.
हो बांद 10-11 म्हयन्यां आदीं मिराबाग गांवांत उदका स्रोत खात्याच्या माध्यमांतल्यान हाडिल्लो. सांगें सावन जें उदक येता तें आडावन प्रभारांत जे ल्हान ल्हान वाडे आसात तांकां उदक मेळना, तांकां उदक दिवचे ह्या उद्देशान आपणे हो बांद हाडपाचो यत्न केल्लो. तेन्ना मेजक्याच लोकांनी गांवांतल्या लोकांक खुबळावन घालून ह्या बांदाक विरोध केल्लो. पयशे घेवन आपणे आनी आपल्या वांगडा आशिल्ल्यांनी हो बांद गांवाचेर थापला, असो आमचेर आरोप करून हो बांद गांवांतल्यान धांवडावन घालपाचो यत्न केल्लो. त्या वेळार गांवाक जर त्रास जाता आनी गांवच्या लोकांक बांद नाका जाल्यार आपल्याकूय तो नाका ह्या उद्देशान आपणे गांवा वांगडा बसका घेतली. 100 टक्के लोकांनी बांद नाका असो थाराव ग्रामसभेंत मांडलो आनी हो विशय सोंपयलो. मात 20-25 दीस जाले होच बांद ते सुवाते वयल्यान गांवा सावन 50 मिटर आशिल्ले सुवातेर सरपंचाक आनी थळाव्या पंचाक विस्वासांत घेनासतना तशेंच पंचायतीचो नाहरकत दाखलो घेनासतना फळणे गांवांत व्हेला. एक बांद जो गांवांत नाका म्हूण ताका धांवडावन घातलो तेच लोक हो बांद परतून गांवांत हाडपाचो कित्याक यत्न करतात, असो प्रस्न संजय नायक हांणी उपस्थीत केला.
दयानंद लाडी हांणी सांगलें, गांवांतल्या लोकांक त्रास जातलो म्हूण ज्या बांदाचो विशय सोंपयल्लो तोच बांद परतून गांवांत हाडपाचो कांय लोक यत्न करतात. सोमारा हो बांद बांदपाच्या कामाक सुरवात जातली. आमी गांवांतले लोक एकवटीत रावून हें काम बंद उडयतले.
सत्यवान नायक हांणी सांगलें, लोकांक धमकी दिवन दादागिरी करून गांवांत बांद हाडपाचो यत्न करप्यांक आमी ओगी बसचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
