भांगरभूंय | प्रतिनिधी
कंत्राटदाराक धांवडायलो, मशिनांय काडपाक लायलीं
भांगरभूंय । प्रतिनिधी
सांगें : मिराबाग सांवड्डेंच्या जुवारी न्हंये वयल्या प्रस्तावीक बांदाक थळाव्यांचो विरोध अजून कायम आसून लेगीत काम सुरू केल्ल्यान सोमारा 9 फेब्रुवारीक सकाळीं थळाव्या लोकांनी काम बंद उडयलें आनी मशिनां काडपाक लायलीं. ह्या विशया वयल्यान पुलीस बंदोबस्त आसून लेगीत खूब तणाव निर्माण जालो.
फाटल्या देड वर्सा सावन बांदाचो विशय गाजता आनी ह्या विशया वयल्यान गांवांत फूट पडिल्ल्याचेंय दिसता. ह्या विशयाचेर खूबश्यो बसका जाल्यो. गांवागांवांत जागृती निर्माण केली. हो बांद जाले उपरांत गांवाचेर संकश्ट येतलें. संगमेश्वर देवूळ लेगीत उदका पोंदां वतलें. न्हंयेदेगेच्या पांच गांवांचेर परिणआम जातलो. अशें आसून लेगीत सरकार कोणाच्या तरी फायद्याक लागून हो प्रकल्प हाडपाक सोदता. गांवाचेर येवपी संकश्ट पयस करचे खातीर हो बांद नाकाच, अशें थळाव्या लोकांचें म्हणणें आसा.
देड वर्सां आदीं ह्या विशयाचेर आमदार गणेश गांवकार, निलेश काब्राल हांचे सयत अधिकाऱ्यांचे हाजिरेंत बसका आपयिल्ली. पयलेच बसकेंत थळाव्या लोकांनी गांवांत बांद नाकाच अशी भुमिका घेतिल्ली. पूण ते उपरांत थळाव्या लोकांक काळखांत दवरून हो बांद दुसरे सुवातेर व्हेलो. खणकाम लेगीत सुरू केल्लें, थंय लेगीत लोकांनी ताका विरोध केलो. लोकांनी काम बंद उडयलें, पूण कांय म्हयन्यांनी अचकीत कोणाक सांगिनासतना, कोणाकूच विस्वासांत घेनासतना आदलेच सुवातेर बांद बांदचे खातीर खणपाक लागिल्ल्यान परतून लोकांनी बसका घेतल्यो.
8 फेब्रुवारीक गांवांतल्यो लोकांनी व्हड सभा घेतिल्ली आनी ताका बरो प्रतिसाद लेगीत मेळिल्लो. ‘आमचो गांव आमकां जाय, बांद नाका’ अश्यो घोशणाय लोकांनी दिल्यो. हे सभेंत काम बंद उडोवपाचो निश्चेव लेगीत केलो, पूण सोमारा सकाळीं काम सुरू केल्ल्यान थळावे लोक तिकडले. खूब तणाव जालो. काम बंद उडयलें आनी मशिनां काडपाक लायलीं. तशेंच कंत्राटदाराक धांवडावन घातलो आनी इंजिनियराक धारेर धरलो.
आमी उदका खातीर विरोध करिनात. लोकांक जर पियेवपाचें उदक जाय जाल्यार पंप हावस बसोवचो आनी पायपलायनींतल्यान उदक व्हरचें. बांद बांदपाची कसली गरज? जीव गेल्यार उपकारता, पूण बांदाक विरोध आसतलोच, अशी शिटकावणी थळाव्या लोकांनी सरकाराक दिल्या.
संकेत भंडारी हांणी सांगलें, आमचे जमनीर कोणेय अतिक्रमण केलें जाल्यार आमी ओगी बसचे नात. आमच्या गांवाची राखण करचे खातीर आमी मुखार सरल्यात. ही सुवात पवित्र आसा. ह्या वाठारांत म्हारू देवूळ, गणपती पावोवपाची सुवात आसा. ते सुवातेची आनी गांवची बिटंबना करपाक दिवचे नात.
विश्वमाला नायक हांणी सांगलें, हे सुवातेंत कोणाकूच आमी प्रवेश करपाक दिवचे नात. पासियेंस सोंपल्यार, आमी कायदोय हातांत घेवपाक फाटीं फुडें पळोवचे नात. उपेंद्र नायक हांणी सांगलें, सरकारान गांवाचेर व्हड संकश्ट हाडलां. आमी परत परत आराखडो दाखोवचो अशें मागतात. खंयचो प्रकल्प आसा, ताचो तकटो लायात. पूण थळाव्या लोकांचें कोणूच आयकून घेना. आतां जबरदस्तीन काम सुरू केलां. कितेंय जालें तरीय आमी गांवांत बांद बांदपाक दिवचेच ना, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
