भांगरभूंय | प्रतिनिधी
भांगरभूंय । प्रतिनिधी
वाळपयः न्हंयच्या पात्रांत प्लास्टिक आनी हेर तरेचो कोयर उडोवपाच्या प्रकारांक लागून जैवविविधतायेर परिणाम जावपाची भिरांत आसता. ताका लागून न्हंयची राखण करपाची गजर आसा. ठाणेच्या पंचायत मंडळान ह्या कामांत फुडाकार घेवंन गोंय मिनरल फावंडेशाचे मजतीन ठाणे हांगच्या न्हंयचे पात्र नितळ करपाचें काम हातांत घेतलें. सरपंच नीलेश परवार, पंच वांगडी सोनिया गांवकार, सरिता गांवकार, विनायक गांवस, सुभाष गावडे, सीआरपी प्रवीण गांवकार, मनिषा गांवकार आनी गोंय मिनरल फावंडेशाचो प्रकल्प अधिकारी आदित्य बोट्टरकर, करिष्मा ताटे, अनुराग सिन्हा हांणी नितळसाणेचें काम केलें.
न्हंयच्या पात्रांत प्लास्टिक कोयर चड प्रमाणांत मेळ्ळो. ताका लागून सरपंच परवार हाणे हु्स्को उक्तायलो. जैवविविधताय ही सैमाचो म्हत्वाचो घटक आसा. ताची राखण केली ना जाल्यार फुडाराक व्हडल्या संकश्टांक तोंड दिवचें पडटलें. गावांनी आशिल्ल्या बांयचें उदक प्रदूशीत जावचें न्हय हे खातीर दरेकल्यान जतनाय घेवपाक जाय. न्हंयचे उदक दुशीत जाल्यार ताचे कसले परिणाम भोगचे पडटले हाची म्हायती तांणे दिली.
गोंय मिनरल फावंडेशना वतीन पर्यावरण आनी सैमाची राखण करपाच्या कामाक प्राधान्य दिलां.ते खातीर फावंडेशनाच्या माध्यमांतल्यान निधी खर्च करतता. भुरग्यां मदीं पर्यावरण राखणे खातीर संवेदना तयार जावची हाचे खातीर हे उपक्रम गरजेचे आसात अशें बोट्टरकरान सांगलें. न्हंयच्या पात्रांतल्यान एकठांय केल्लो कोयर ठाणे पंचायती वतीन कोयर वेवस्थापन म्हामंडळाक धाडटले अशें ताणे सांगलें. कोयरा विशीं पंचायत वाठारांत लोक जाग्रुताय करपाचे काम करतले. कोयर वेवस्थापनाची म्हायती दिवपा खातीर खासा कार्यावळ पंचायती वतीन आयोजीत करतले अशें सरपंच नीलेश परवारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
