भांगरभूंय | प्रतिनिधी
खबरां संस्था
नवी दिल्लीः बायल कुस्तीगिरांचेर लिंगीक अत्याचार केल्ल्याच्या आरोपा वयल्यान ब्रिजभूषण सिंहाचेर एफआयआर दाखल केला. कुस्तीगिरांनी आपलें आंदोलन तात्पुरतें स्थगीत केला. गुन्यांवकार ब्रिजभूषणाचेर जाता तितल्या बेगीन कारवाय करची अशी तांची मागणी आसा. मजगतीं पुलिसांनी बायल कुस्तीगिरांक ब्रिजभूषणान मिठी मारिल्ल्याचे फोटे, व्हिडिओ आनी ऑडियो दाखयात हे खातीर नोटीस धाडल्या.
एफआयआर प्रमाण लिंगीक छळणुकेच्यो घडणुको 2016 तें 1019 मजगतीं 21 अशोका रोड हांगच्या डब्ल्यूएफआयच्या कार्यालयांत आनी ब्रिजभूषण सिंहाच्या बंगल्यांर जाल्लो. तशेंच कांय घडणुको विदेशांत सर्ती मजगतीं जाल्ल्यो. एका बायल कुस्तीगिरान विदेशांत व्हडलें पदक जिखल्या उपरांत ब्रिजभूषणान ताका 10 तें 15 सेकंद मिठी मारल्ली. ह्या वेळार ब्रिजभूषण चड लागीं येवचो न्हय म्हणून तिणे आपल्या थानार हात दवोरल्लो. हे मिठीचो फोटो पुलिसांनी मागला.
घडिल्ल्या घडणुकांची तारीक, वेळ, कार्यालयांत काडिल्लो वेळ, रुममेटांची म्हायती पुलिसांनी कुस्तीगिरां कडेन मागल्या. तशेंच विदेशांत ज्या वेळार घडणुको जाल्यो तेन्नाच्या साक्षिदारांची नावांय पुलिसांनी दिवपाक सांगल्यात. कागाळ दाखल केल्या उपरांत ब्रिजभूषण सिहान कागाळ केल्ल्याक धमकी दिल्ली असोय ताचेर आरोप आसा. ताची शहानिशा करपा खातीर धमकीचे पुरावेय पुलिसांनी मागल्यात. धमक्या दिवपी कॉलां कडेन संबंदीत व्हिडिओ, फोटे, कॉल रिकॉर्डींग, व्हॉट्सअॅपची चॅट सादर करपाची नोटीस संबंदीत कागाळदार बायल कुस्तीगिराक धाडल्या. नोटिशीचेर कॅनॉट प्लेस पुलीस स्टेशनाच्या तपास अधिकाऱ्याची सय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
