भांगरभूंय | प्रतिनिधी
आयज भाजयेंत मीठ घालें ना?, आयज भाजयेंत चड मीठ आशिल्लें, हीं वाक्यां घरांत सदांच आयकूंक मेळटात. आमच्या आहारांत मीठ हो म्हत्वाचो घटक. खंयच्याय पदार्थात मात्शें लेगीत चड वा उणें मीठ आसल्यार ताची पुराय रुच बदलता. हे सोडियमाचे कण दरेक भाजयेक, दरेक ग्रेवीक आनी दर एका आवडीच्या जेवणाक रूच दितात. मीठ ना जाल्यार तुमकां आवडटा तें रुचीक जेवण लेगीत पुरायपणान बेचव जातलें.
सगळ्या वस्तूंचो अतिरेक वायट आनी मीठाचो अतिरेक लेगीत वायटूच. चड मीठ खाल्यार भलायकेचेर वायट परिणाम जातात. देखून आमच्या आहारांतल्या मिठाचें सेवन नियंत्रीत करप गरजेचें नाजाल्यार ताका लागून आमच्या अवयवांक ल्हवू ल्हवू लुकसाण जावंक शकता. संवसारीक भलायकी संघटनेच्या मानका प्रमाण एका दिसांत फकत 5 ग्राम मीठ (सुमार 2 ग्राम सोडियम) खावचें. चड मीठ खाल्यार रगतदाब वाडपाक शकता, जाका लागून काळजाच्या दुयेंसांचो धोको वाडटा.
एका दिसांत कितलें मीठ खावंचें?
संवसारीक भलायकी संघटनेच्या म्हणण्या प्रमाण, संवसारभर मीठ चड प्रमाणांत खावप हें मरण येवपाचें मुखेल कारण. चडशे लोक थारायिल्ल्या मानकां परस चड सोडियम खातात अशें आंकडेवारींतल्यान दिसून येता. प्रक्रिया केल्ल्या खाणां पसून सुमार 75 टक्के मीठ आमचे कुडींत भितर सरता.
जायत्या उण्या उत्पन्नाच्या आनी मध्यम उत्पन्नाच्या देशांनी लोक नुस्त्याच्या चटणेंतल्यान वा सोया सॉसांतल्यान मीठ खातात. मीठ खावपाचेर मर्यादा घाल्यार काळजाच्या दुयेंसांतल्यान स्वताची राखण करूं येता. काळजाचो आताक आनी स्ट्रोक हाका लागून दर वर्सा सुमार 2 कोटी 50 लाख लोकांक मरण येता. तशेंच मूत्रपिंडाचे दुयेंस जावपाचोय धोको वाडटा.
उच्च रक्तदाब
मीठ चड प्रमाणांत खाल्यार रक्त दाबाचो त्रास जावंक शकता. मूत्रपिंडांक अतिरिक्त द्रव भायर काडपाक मेळना तेन्ना रगतदाब वाडपाची शक्यताय आसता. सोडियम चड प्रमाणांत घेतल्यार रगतदाब वाडटा आनी काळजाचो आघात जावपाचो धोको वाडटा. मीठ चड आशिल्लें आहार घेतल्यार उदक सांठोवन उरता आनी पोट फुगपाची जाणविकाय जावंक शकता. कुड उदक आनी सोडियम हांचे प्रमाण समतोल दवरपाचो यत्न करता. आनी तें तिगोवन दवरपा खातीर चड मीठ चड उदक तिगोवन दवरता. हाचो दीर्घ काळांत मूत्रपिंडांचेरूय ताचो परिणाम जावं येता.
ऑस्टियोपोरोसिस
चड काळ अन्न पदार्थांत चड मीठ घेतल्यार कुडीच्या ऊतीत आनी पेशींत द्रव सांठोवन उरुंक शकता. ताका लागून कुडीक कॅल्शियम भायर सरपाक लायतात आनी ताका लागून हाडांचो नाश जाता आनी ऑस्टिओपोरोसिस जाता.
हेल्थलायन डॉट कॉम हांच्या अहवाला प्रमाण चड मीठ खाल्यार तान वाडटा. तुमची कुड अतिरिक्त सोडियम पातळ करपा खातीर सेवन केल्लें अतिरिक्त द्रवाचो उपेग करता तें बेगीन उत्सर्जीत करुंक शकना, तुमच्या मुताचे प्रमाणांत बदल जायना, म्हळ्यार अतिरिक्त द्रव तुमच्या कुडींत उरता. देखून अचकीत सोडियमाचें सेवन वाडल्यार तुमचें वजन द्रव स्वरुपात कांय प्रमाणांत वाडूंक शकता.
ह्या खाणांत मीठ चड
प्रक्रिया केल्लें मांस, डब्यांतलें मांस, सॉसेज, पिझ्झा, व्हाईट ब्रेड, खारीं कड्डणां, कॉटेज चीज, सॅलड ड्रेसिंग, बटाट्याचे काप, हॉट डॉग, लोणचें, सोया सॉस, नुस्त्याची चटणी, टमाट सॉस आनी गोठयल्लें दर्यांतलें अन्न.
मीठ खाल्ल्यान कुडीक लुकसाण जाता अशें न्हय तर ताचे योग्य प्रमाणांत सेवन करपाची गरज आसा. मिठांत सोडियम आनी पोटॅशियम हे दोनूय प्रकार आसतात, जांकां लागून कुडींत उदकाची पातळी योग्य प्रमाणांत दवरपाक मजत जाता. ताच्या आदारान ऑक्सिजन कुडीच्या सगळ्या भागांत पावता. तशेंच मज्जासंस्था आनी रगतपेशींचे कार्य करपाक आदार करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
