भांगरभूंय | प्रतिनिधी
-मिठागरांंच्या जतनाये खातीर अर्थीक सहाय्य दिवपी येवजण जाहीर
पणजी : राज्यांतल्या मिठागरांची जतनाय करपा सयत बंद आशिल्ली मिठागरां सुरू जावची ह्या हेतान अर्थीक मजत दिवपी येवजण सरकारान जाहीर केल्या. हे येवजणे खाला मिठागरांं खातीर खासा केंंद्र सुरू जातले. हे भायर शेतकारांक 1 लाखाची अर्थीक मजत मेळटली.
राज्यांतली बरीच मिठागरा बंद पडल्या. काय मिठागरा बंद पडपाच्या वाटेर आसा. तिसवाडी आनी पेडणें म्हालातूच मिठागरांचो वेवसाय सुरू आसा. आसा ती मिठागरा चलची आनी बंद पडिल्ली सुरू जावची म्हूण सरकारान येवजण सुरू केल्या. हे येवजणे खाला मिठागरांच्या वेवस्थापना खातीर खासा केंद्र सुरू जातले. केंद्राचे कार्यालय आनी प्रशासकी खर्चा खातीर 10 लाखांची तजवीज आसा. तशेंच केंद्रांतल्या वैज्ञानीक अधिकारी आनी हेर कर्मचाऱ्यांच्या पगारा खातीर 10 लाखांची तजवीज आसा. हे भायर 75 मिठागरांचो वेवसाय करपी शेतकारांक दरेकी 1 लाखाची मजत मेळटली. पुराय 95 लाखांची तजवीज येवजणे खातीर सरकारान केल्या.
मिठागर केंंद्रा खातीर वैज्ञानीक अधिकारी तशेंच हेर कर्मचाऱ्यांची नेमणूक सरकारा वरवीं जातली. लॅपटॉप, टेबलां तशेंच स्टेशनरी खातीर 10 लाखांची तजवीज केल्या. मिठागरां खातीरचे तंंत्रज्ञान, मिठाचे मार्केटिंग हे विशीं प्रशीक्षण कार्यावळीचे आयोजन जातलें. तशेंच कुशळटाय प्रशिक्षण तशेंच हेर राज्यांच्या मिठागरांक भेट दिवपी कार्यावळी जातल्यो. गोंय राज्य जैवविवीधताय मंंडळा वरवीं ह्यो कार्यावळी जातल्यो. हे विशींच्या खर्चाक गरजे प्रमाण मान्यताय मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
