मिठागरां तिगोवपाक बेगिनूच धोरण

भांगरभूंय | प्रतिनिधी

मुख्यमंत्री : खावपा वांगडाच कॉस्मेटीक वापरा खातीर मिठाची चांचणी

भांगरभूंय । प्रतिनिधी

पणजीः गोंयांतलीं मिठागरां तिगोवन दवरचे खातीर जैवविविधता मंडळा कडल्यान धोरण तयार करपाची प्रक्रिया चालीक लायतले. हे खातीर उदकास्रोत खात्या कडल्यान मानशी बांदपाचें काम येता त्या ऑक्टोबर सावन सुरू जातले, अशें मुख्यमंत्री डॉ. प्रमोद सावंत हांणी सांगलें.

मुख्यमंत्री डॉ. प्रमोद सावंत हांणी सांत आंन्द्रेचे आमदार विरेश बोरकार हांचे वांगडा भाटी वाठारांतल्या मिठागरांची पळोवणी केली. ह्या वेळार गोंय राज्य जैवविविधताय मंडळाचे वांगडी सचीव डॉ. प्रदीप सरमोकादम, शेतकी संचालक संदीप फळदेसाय, उदकास्त्रोत खात्याचे संचालक ज्ञानेश्वर सालेलकार, आगरकार, पंच वांगडी हजर आशिल्ले.

पळोवणे उपरांत उलयतना मुख्यमंत्र्यान सांगलें, आमदार बोरकार हांच्या सांत आंन्द्रे मतदारसंघांत 50 परस चड मिठागरां आसात आनी तीं तिगोवन दवरप गरजेचें. हीं मिठागरां पुर्नजीवीत करपा खातीर गोंय राज्य जैवविधताय मंडळ मिठागरां खातीर एक वेगळें धोरण चालीक लायतलें. आपणें आगरकारांची समस्या आयकून घेतल्या. तांचे खातीर मानस बांदतले आनी मिठागरां नितळ करतले. मानस बांदपाचें काम येता त्या ऑक्टाबरा सावन सुरू जातलें, अशें आस्वासन मुख्यमंत्र्यान दिलें.

जैवविधताय मंडळ आगराकारां खातीर एक मार्केट तयार करून तें मीठ विकतें घेतलें. तशेंच तांचें मीठ खावपा वांगडाच कॉस्मेटीक वापरा खातीर चांचणी करपाक धाडटले. आमी एकदंरीत अहवाल तयार करतात आनी तो पुराय जाले उपरांत आमी धोरण थारयतले, अशी म्हायती मुख्यमंत्र्यान दिली.

गोंयचीं मिठागरां खाशेलीं आसात आनी तीं तिगोवन दवरप काळाजी गरज आसा. ही गोंयची जैवविविधताय तिगोवन दवरपा खातीर सरकारन विधानसभेंत आस्वासन दिलां तें पुराय करतले. आमदार विरेश बोरकार हांणी हो विशय विधानसभेंत मांडिल्लो आनी तो विशय सुटावो करपा खातीर सरकार कार्यरत आसा, अशें मुख्यमंत्र्यान म्हणलें.

सरकारा कडल्यान बांद बांदपाक, मानस बांदपाक, पोंयो उस्पुपाक सरकार कडल्यान कसलीच मजत वा तेंको मेळनाशिल्ल्यानल्ल्यान हे आगर सध्या खाजगी वेवसाय जाल्यात, अशें बोरकार हांणी सांगलें.

हो विशय विधानसभेत मांडले उपरांत मुख्यमंत्र्यान तांची भेट घेवन शेतकारांची खरी परिस्थिती कितें आसा तांचे कितें विशय आसात हें आयकून घेवन गरजेच्या धोरणाची अंमलबजावणी करपाचें आस्वासन दिलां. ह्या आगरकारांक जें अनुदान जाय तें ऑक्टोबर मेरेन निश्चीत करतले, अशी म्हायती बोरकार हांणी दिली. केंद्रीय मीठ संशोधन आनी विश्लेषण प्राधिकरण गुजरात हांगासर हें मीठ चांचणे खातीर धाडून तें बऱ्या दर्जाचें अशें दिसून आयलां. आतां ह्या मिठाचें रसायन तपासपा खातीर फुडें विश्लेशण करून हेर खात्यांक वांगडा घेवन हो वाठार कसो घटमूट करपाक शकतात हाचेर लक्ष दितले, अशें गोंय राज्य जैवविविधताय मंडळाचे वांगडी सचीव डॉ. प्रदीप सरमोकादम हांणी सांगलें.

मिठगरां खातीर खास येवजण

आमी ह्या मिठगरां खातीर एक येवजण तयार करपाचे आसात. आगरकारांनी सांगिल्ल्यो गरजो आनी मुख्यमंत्र्याच्या मार्गदर्शना खाला आमी काम करतात. तशेंच 30 – 40 वर्सां मिठारांचेर काम करपी विज्ञानिकांचो आस्पाव केला. ही येवजण चालीक लावपा खातीर राज्य पांवड्यार कृती पंगड तयार केला. हो वाठार पुर्नजिवीत करपा खातीर गुजरातच्या संस्थेच्या जोडपालवान आमी तांत्रिकी मजत मागल्या, अशें डॉ. प्रदीप सरमोकादम हांणी म्हणलें.