भांगरभूंय | प्रतिनिधी
सिटिझन्स फॉर डेमोक्रॅसी वतीन मुखेल वीज अभियंत्यांक निवेदन
पणजी: आडखळीचे सुवाते वेले वीज मिटर सोयीचे सुवातेर बसोवपाची नोटीस वीज खात्यान घरगुती गिरायकांक दिल्या. आडखळीच्या जाग्यार वीज मिटर आसत जाल्यार जोडणी तोडपाची शिटकावणी वीज खात्यान दिल्या. वीज खात्यान ही नोटीस फाटीं घेवन रिडिंगाचे फोटे धाडपाची मेकळीक दिवची, अशी मागणी सिटिझन्स फॉर डेमोक्रॅसी संघटणेन मुखेल वीज अभियंत्यांक केल्या.
घरां भितर आशिल्ले मिटर भायर बसोवपाची नोटीस वीज खात्यान दिल्या. तशेंच उंचायेर आशिल्ले वीज मिटर सकयल हाडचे. जेणे करून मिटर रिडरांक रिडींग पळोपाक आडमेळीं जावची ना. घरां बंद आसतात तेन्ना मिटर रिडरांक भितर आशिल्ल्या मिटरांचे रिडींग घेवप शक्य जायना. हाचे खातीर वीज खात्यान मिटरांचे स्थलांतरण करपाची नोटीस जारी केल्या. वीज मिटर स्थलांतरण करपाची मुजत सोंपल्या. वीज जोडणी तोडपाची कारवाय मात वीज खात्यान अजून मेरेन करूंक ना. हे फाटभुंयेर सिटिझन्स फॉर डेमोक्रॅसी संघटणेन मुखेल वीज अभियंत्यांक हें निवेदन दिलां.
जे मिटर घरा भितर आसात, तांच्या रिडिंगाचे फोटे व्हॉट्सअॅपाचेर धाडपाची सुचोवणी गिरायकांक दिवची. आपणाक सोयीचे थारता ते पद्दतीन गिरायकांक वीज मिटर बसोवपाची मेकळीक आसपाक जाय. हो गिरायकांच्या प्रायवसीचो प्रस्न आसा. वीज खातें आतां डिजिटल मिटर बसोवपाचे आसात. हे फाटभुंयेर आतांच वीज मिटरांचें स्थलांतरण करप वेव्हारीक जावचे ना. डीजीटल मिटर सोयीच्या थळाचेर बसोवपाची मेकळीक आसा, अशें निवेदनांत म्हणलां.
सिटिझन्स फॉर डेमोक्रॅसीचे संघटक एल्वीस गोम्स, प्रदीप पाडगांवकार, मेल्वीन फर्नांडीस हांणी हें निवेदन भेटयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
