भांगरभूंय | प्रतिनिधी
दर वर्सा पावसा पयलीं वीज खातें लायट काडटा. तशी लायट वर्सूयभर वचत आसता, पूण ह्या एका दिसा खातें कांय दीस पयलींच जायरात बी दिवन लोकांक लायट काडटले म्हणपाची सुचोवणी करता. जायरात वाचतकूच कोणाकूय दिसचें गोंयांत एकूच दीस लायट आसना म्हणून. सगळे तसोच समज करून घेतात आनी तांचेर बोवाळ पडटा. आमकां दवर्लेकारांक तर दिसाक चारदां लायट वचना तर चुकिल्लेवरी दिसता. आमी दवर्लेच आसात मूं म्हणपाचो प्रश्नूय पडटा. फाटल्या आमदाराक एक दीस विचारिल्लें, ‘सायबा, कोट्यांनी रुपया मोडून केल्ल्या विकासाचीं बातां मारता, त्या विकासांत वीज येना? अखंडीतपणान चोवीस वरां लायट मेळपाचो विकास कर न्ही.’
ताणें जाप दिली, ‘मात्शे रावात. आतां रोखडेंच अंडरग्रावंड जातलें, उपरांत हे त्रास जावचे नात.’ आमी अंडरग्रावंड जावपाची वाट पळोवंक लागले. पूण कांय दिसांनी आमदारूच अंडरग्रावंड जालो म्हणपाचें आयकूंक आयलें. तो नावेलीच्यान
अंडरग्रावंड जावन बद्द तणारुपान बंगालाक किल्ललो. हालींच परतला म्हणपाचें आयकूंक आयलां. आतां इंदिरा तण जावन हांगा मातता काय चिखलांत फुलता तें रोखडेंच कळपाचें आसा.
आमचो लायटीचो प्रश्न मात तसोच उरलो. आतांय म्हूण
विकास कोटीचीं उड्डाणां मारता आनी आमची लायट वरांचीं वरां गूल जाता.
तर अंदूंय वीज खात्यान वर्सावळी प्रमाण पावसाळी मेंटेनेंन्सा खातीर लायट काडपाचें थारायलें आनी तो दिसूय जाहीर जालो. पूण अंदूं तांकां पयली फावट, दुसरी फावट करून तिसरे फावटीं सा वो सा करचें पडलें. एकदां शिगम्याक लागून आनी उपरांत ‘मनांच्या बातांक’ लागून कार्यावळ मुखार व्हरची पडली. तांचें सा जाता म्हणल्यार आमची दवर्लेची लायट मात तीन फावटीं काडली. सदां वता ती अर्द पाउण वरा खातीर पूण ही पुराय आदेस काडली. खंय जायरात ना वा कसली कळोवणी. लायट सकाळ फुडें गेली ती बद्द दनपरां आयली. आतां लायट कित्याक गेल्या वा केन्ना येतली हें विचारूंक फोन केल्यार लँड लायन चलना आनी मोबायल स्वीच ऑफ. ताणीं जायरातींत एकवीस तारकेर लायट काडटले म्हणिल्लें काय एकवीस तारीक मेरेन काडटलें म्हणिल्लें तेंच कळप कठीण जाल्लें. जायरात काडून वाचतले म्हणल्यार पेपर आॅन लायन आनी लायट ना म्हणटकूच नेट ना. नेट नासतकूच आमचो नेट गेलो. आलिया भोगासी म्हणपाचें आनी वोगी बसपाचें.
इतले दीस म्हाका हें दवर्लेच घडटा अशें दिसतालें. पूण पयरूच घोगळांत एके इमारतीची लायट दोन रातीं ना जाली तें पळोवन मात आमी सुखी दिसले. आज गेल्ली लायट बद्द परवां येवप म्हणजे थंय रावतल्यांक ह्या उबाळांत कितें भोगपाचें ताचो विचारूच करूं नजो. वीसेक फ्लॅट आनी सात- आठ दुकानां दोन राती काळखांत उरप म्हणजे कितें हाल जावपाचे पळेयात. कश्यो काडल्यो आसतल्यो काय दोन राती ह्या लोकांनी? आनी हांगसरली लायट तर अंडरग्रावंड जाल्या.
आतां प्रश्न पडटा, वीज खातें ही एका दिसाची लायट काडपाची भोगावळ कित्याक करता काय? जेन्ना दवर्ले सारक्या वाठाराक मेंटेनेंन्सा खातीर तीन तीन दीस लायट काडची पडटा आनी इतलें आसुनूय पावसांत वा हेर दिसांनीय लायटीच्यो भोयोभोयो जाताच थंय पुराय दक्षीण वा उत्तर गोंयचे मेंटेनेंन्स एका दिसा भितर कशें कितें करतात काय? आनी एकाच दिसान जर पुराय गोंयचें मेंटेनेंन्स शक्य आसा जाल्यार आमची लायट तीन तीन दीस कित्याक काडची पडटा? वीज खात्या कडल्यान हाची जाप
मेळत?
बरें, इतलें मेंटेनेंन्स करुनूय दर दिसा चार फावट लायट वचपाचें कारण कितें? एकवीस तारकेर लायट काडली. तरी बावीस तारकेक सकाळीं स ते साडेसात मेरेन लायट खंय गेली? फॅक्टर्यांक लायट उणी पडटा म्हणून बी ही लायट गूल जायना मूं? घरांतली लायट काडून ती फॅक्टर्यांक दिवपाचें चलना मूं? पूण हाका लागून फकत घरांनी रावप्यांकूच त्रास जायनात जाल्यार वाठारांतल्या ल्हान-सान आस्थापनांक ताचो मार बसता हें खात्याक कळूंक नाका आसलें? आज लायटी बगर कोणाचेंच पान हालना. दर एके गजालीक लायट जायच आसता. एकदीस जायरात दिवन लायट काडटात तेन्ना लोकांक कितेंय तजवीज करूंक मेळटा. पूण अकस्मात लायट वता तेन्ना जावपी हाल वीज खात्याक कळनात? काय तांकां लोकांचें पडुनूच गेल्लें ना.
हें अशें कित्याक जाता? वीज उणी आसा म्हणून? जाल्यार मागीर सरकार व्हडल्या व्हडल्या फॅक्टर्यांक येवकार कसो दिता? पयरूच कांय कोट्यांचे प्रोजेक्ट पास केल्यात म्हणपाचें सरकारान जाहीर केलां. तांकां लायट लागचिना? ताची तजवीज कशी करतले? लायटीचे जर अशे हाल जावंक लागले जाल्यार कशे चलतले हे प्रोजेक्ट? ल्हान आस्थापनां आनी घरांतली लायट कांय वरांक बंद करून तांकां दितले? व्हड प्रोजेक्टांची भर करचे खातीर ल्हान आस्थापनांचेर हावळ हाडटले? हाची जाप मेळप गरजेचें. वीज खात्यान दर वाडयले तरी लोक मोन्यांनी बिलां फारीक करतात. कारण वीज ही लोकांची गरज. विजे बगर लोकांचे जायना. म्हणटकूच वीज खात्याचें कर्तव्य आमकां वेवस्थीत लायट
मेळटली हें पळोवप. लायट काडटले जाल्यार एक- दोन दीस पयलीं लोकांक कळोवप ही खात्याची लागणूक थारता. लायट कित्याक काडटात तेंय आमकां कळूंक जाय. कोणाच्या मनाक मारता म्हणून लायट काडप सारकें न्ही. जेन्ना पुराय जिल्ह्यांत लायट काडपाचें थारलें तेन्ना सगळे कडलें मेंन्टेनेंन्स त्याच दिसा करपाचें. ताचे पयलीं एक- दोन दीस वेगवेगळे कडेन लायट काडपाचें कारण कितें?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
