भांगरभूंय | प्रतिनिधी
– लालदुहोमा राज्यपालां कडेन करतले सत्ता स्थापनेचो दावो
आयझॉलः मिझोरामांत झोराम पिपल्स मुव्हमेंट (झॅडपीएम) पक्षान 27 सुवाताे जिखून सत्ताधारी नॅशनल फ्रंटाक (एमएनएफ) हारयल्या. एमएनएफ पक्षाक फक्त 10 सुवातांचेर समाधान मानचें पडलें. दुसरे वटेन तीन राज्यांनी भोवमत मेळयिल्ल्या भाजपाक फक्त दोन सुवातो जिखप शक्य जाले. जाल्यार काँग्रेसीक फक्त एका सुवातेचेर समाधान मानचे पडलें.
झोराम पीपल्स मुव्हमेंट पक्षाचे सर्वेसर्वा लालदुहोमा हांणी पर्जळीत कामगिरी करून भोवमत मेळयलें. ताका लागून तांचो मुख्यमंत्री पदाचो मार्ग मेकळो जाला. मजगतीं, आपूण फाल्यां वा परवा राज्यपालांची भेट घेतलो. ह्या म्हयन्यांत नव्या सरकाराचो सोपूतविधी जातलो, अशें लालदुहोमा हांणी सांगलें. जाल्यार पक्षाचे उपाध्यक्ष डॉ. केनेथ चव्हांगलियाना हांणी ह्या निकाला उपरांत लोकांचे उपकार मानले.
मिझोरामा उपमुख्यमंत्री तवान्लुइया तुईचांग हांच्या मतदारसंघांत झॅडमपीएम चे उमेदवार डब्ल्यू चुआनावामा हांणी बाजी मारल्या. 909 मतांच्या फरकान तांणी उपमुख्यमंत्र्यांक हारयले. मजगतीं, मुख्यमंत्री झोरमथांगा हांच्या ऐझॉल पूर्व- 1 मतदारसंघांत झॅडपीएम चे उमेदवार लालथनसांगा हांणी बाजी मारली. तांणी झोरमथंगा हांकां हारयले.
मजगतीं, 10 वर्सां सत्तेंत आशिल्ल्या काँग्रेसीक 2018 चे विधानसभा वेंचणुकेंत सरकार वगडावचें पडिल्लें. पी. ललथनहवला चांफई दक्षीण आनी सेरछीप ह्या दोनूय सुवातांचेर वेंचणूक हारिल्ले. ‘एमएनएफ’ चे थेट लडतींत काँग्रेसीक हार घेवची पडली. झोरमथांगा मुख्यमंत्री जाले. ते उपरांत एमएनएफाक 26, काँग्रेसीक 5, भाजपाक 1 आनी अपक्षांक 8 सुवातो मेळ्ळ्यो. हे खेपे भाजपाक दोन सुवातांचेर भोवमत मेळिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
