भांगरभूंय | प्रतिनिधी
एखाद्या कलाकाराक आपले भितर लिपिल्ले कलेची वळख करून घेवपाक अमूक पिराये मेरेन रावपाची गरज पडना. ती जल्मतात ताचे भितर आसता, फकत वेळ आयल्या उपरांत खवदळून ती मुखार हाडची पडटा. वाडटे पिराये वांगडा आपले कलेक आत्मसात करुन नवी दिका दाखोवपाचो यत्न करीत जाल्यार कला आनी कलाकार दोगांय फुलां वरवीं पर्जळटात, हातूंत मात्तूय दुबाव ना. ल्हान पिरायेचेर कलेच्या माध्यमातल्यान पुराय संवसारभर नामना जोडपी साबार कलाकार तुमी पळयल्यात आसतलेच. शाळेंत शिकतना विद्यार्थांक एक बरो मार्गदर्शन दिवपी शिक्षक वा गुरू मेळ्ळो जाल्यार विद्यार्थ्या भितरलो कलाकार आनी कला जल्माक येता, अशें आमी पळयलां आनी अणभवलांय. आयज आमी अशेच एका विद्यार्थीं कलाकारा विशीं जाणून घेवया.
आनंदाचे शार कोलकाता हांगां जल्माक आयिल्ली आनी गोंयच्या सर्गमय भूंयेर ल्हानाची व्हड जाल्ली अमिका सरकार. ल्हान पिरायेचेर फॅशन मॉडलिंगाच्या मळार पावल दवरप आनी तातूंत येस जोडप हें दिसता तितलें सोंपें नासता. शाळेंत वचपी विद्यार्थीं जेन्ना फॅशन मॉडलिंगाचे रंगीत दुनियेंत आपलो फुडार करपाचो थारायता तेन्ना ताच्या वाटेर जायतीं आडमळीं येतात. मॉडलींग म्हणल्या उपरांत जायत्या फावटी घरचीं फाटीं फुडें जातात, पूण अमिकाचे बाबतींत अशें घडलें ना. उरफाटें तिच्या आवयन तिका मॉडलिंगाचे वाटेर पावलां उबारपाक उर्बा दिली. वास्कोच्या सेंट अॅण्ड्रयू शाळेंतल्यान विज्ञान फांट्यांत ताणें हालींच बारावेची परिक्षा दिल्या. ताका नाचपाक, चित्र रंगोवपाक खूब आवडटा. सपनां पळोवन तीं प्रत्यक्ष साकार करप हो हेतू बाळगून तिणें फॅशन मॉडलिंगांत पावल दवरलें.
एक कलाकार म्हणून म्हजे भोंवतणी आशिल्ल्या भावनाविवश आनी रचनात्मक कलाकारा कडल्यान हांव प्रेरणा घेता. म्हाका भुरगेंपणांतल्यान विंगड विंगड कपडे घालप, कितें तरी नवीन करपाचो निर्णय घेवप आवडटालें.. आनी म्हाका दिसता मॉडलींग क्षेत्र हाचे खातीर एक बरो पर्याय. ल्हानांतल्यान व्हड जाय मेरेन म्हजी आवय म्हज्या पावला पावला म्हजी उर्बा वाडयता, म्हजो सांगात दिता आनी तिचे हे उपकार हांव केन्नाच विसरूंक शकना. हांवें मीस एथनीक दिवा 2022 त वांटेकार जावन बेस्ट स्मायल पुरस्कार मेळयला. मिस इंडिया 2023 सर्तींत वांटेकार जाले उपरांत हालींच जाल्ल्या मिस इंडिया पेजेंट सर्तींत म्हाका ‘मिस इंडिया बोल्ड पर्सनॅलिटी’ हें इनाम फावो जालें. म्हज्या मतान ‘the best way to predict future is to create it’ आनी हें करपा खातीर आमकां भरपूर कश्ट करचे पडटले, अशें अमिका सरकार हांणी सांगलें.
विष्णू नार्वेंकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
