भांगरभूंय | प्रतिनिधी
काणकोण: नगर्शें, पाळोळ्यां कोमुनिदादीच्या मास्तीमळ हांगचे जमनीर व्हडा प्रमाणांत अतिक्रमण जाल्ल्याचो आरोप करून फाटल्या कितल्याशाच वर्सां पसून हे जमनीचेर काजू आनी हेर उत्पादन घेवपी थळाव्या नागरिकांनी ह्या प्रकरणा आड न्यायालयांत याचिका सादर केल्ली. जिल्लो आनी सत्र न्यायालयान अतिक्रमणाक स्थगिती दिल्या, अशी म्हायती मास्तीमळ हांगा घेतिल्ले पत्रकार परिशदेत थळाव्यांनी दिली. ऍड. विभव आमोणकार हांच्या यत्नांक लागून ही स्थगिती मेळ्ळ्या अशें तांणी सांगलें. स्थगिती मेळिल्ल्यान अर्दे जैत मेळ्ळां. फुडलो लढो चालूच उरलो अशें तांणी स्पश्ट केलें.
काणकोण नगरपालिका वाठारांतल्या किंदळे, देळें, मणगण, पणसुलें ह्या वाठारांतले नागरीक ३०० वर्सां सावन हांगा काजू आनी हेर उत्पादन घेतात. तांतल्या कांय जाणांचीं नांवां मुंडकार म्हणूनय नोंद जाल्यांत. हांगची कांय जमीन जनावरां खातीर, जाल्यार कांय जमीन काजू आनी हेर लागवडी खातीर पुर्वजापसून राखून दवरल्या, अशी म्हायती ह्या वेळार नारायण ना. गांवकार, अनिल ना. गांवकार, शेखर ना. देसाय, प्रमोद ना. गांवकार, शंकर ना. गांवकार, राजू ना. गांवकार, संतोष गांवकार, सर्वानंद काणकोणकार, प्रियदर्शिनी ना. गांवकार, सुचना गांवकार, गोकुळदास देसाय, अॅड. गौरव ना. गांवकर, प्रभाकर कोमरपंत हांणी दिली..
जाच्या नांवार कट रचून कोमुनिदादीची जमीन नोंद केल्यार तांतली सुमार अडेज लाख चौ. मी. इतली जमीन भलत्याच मनशाक कोट्यांनी रुपयांक विकल्या, असो आरोप ह्या वेळार केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
