भांगरभूंय | प्रतिनिधी
विजय सरदेसायः थळाव्यां खातीर काम करतना प्लानाची न्हय, गोंयकारपणाची गरज
भांगरभूंय । प्रतिनिधी
मडगांवः शेतकारां खातीर आनी सामान्य लोकां खातीर काम करतना मास्टरप्लान करपाची गरज ना. इल्लो विचार करपाची आनी काळजांत गोंयकारपण आसचें पडटा. मास्टरप्लान करून कांयच जायना, ताचें मुखार कांयच जायना. ते खातीर मास्टरप्लाना प्रमाण काम करचे खातीर कितली संद आसा, तेंवूय पळोवप गरजेचें आसा. मास्टरप्लान कोणूय कन्सल्टंट करपाक शकता. पूण थळाव्या लोकांक न्याय मेळोवन दिवचे खातीर थळाव्या पांवड्यार देंवून काम करपाची गरज आसता. मास्टारप्लान हो मास्टरप्लानूच उरतलो, अशी प्रतिक्रिया आमदार विजय सरदेसाय हांणी दिली.
आगाळी वाठारांत उदकास्रोत मंत्री सुभाष शिरोडकार हांचे हाजिरेंत बांयच्या कामांचो शुभारंभ केलो. ह्या वेळार आमदार सरदेसाय उलयताले.
फातोड्डेंच्या विवीध वाठारांनी स आरसीसी बांयो सौरउर्जे वयल्या पंपा सयत बांदतले. ह्या प्रकल्पा खातीर 24 लाख रुपया खर्च करतले. शेतकारांक गरजेच्यो त्यो सगळ्यो सोयीसुविधा दिवच्यो. फक्त खरीप मोसमा पुरते शेती उत्पादन उरनासतना वायंगण मोसमांत लेगीत पीक घेवपाक मेळचें, असो यत्न चल्ला. फातोड्ड्यां शार आनी ग्रामीण असो एकवटीत भाग आसा. जाल्यार एसटी समाजा सयत हेर समाजाचे लोक रावतात. सर्वांगी उदरगती खातीर सगळ्यांत वांगडा घेवन वचपाचो यत्न आसा. थळाव्यांनी पिकयिल्ल्या सेंद्रीय म्हालाक हांगाच मार्केट मेळचें. लोकांनीय थळावो म्हाल घेवपाचो यत्न करचो. हे मुखार आनीक 10 बांयो फातोड्ड्यांत जातल्यो. तशेंच फायव्ह स्टार हॉटेलांनी बसून कन्सल्टंट नेमून मास्टरप्लान करतकच लोकांचीं कामां जायनात, अशें सांगून मडगांवच्या मास्टरप्लानाच्या सादरीकरणाचेर आमदार सरदेसाय हांणी प्रतिक्रिया दिली.
गोंयभरांत हजारभर बांयो बांदतलेः सुभाष शिरोडकार
गोंयची जमीन ही भांगरा सारकी. ते जमनीची योग्य मशागत जावपाची गरज आसा. जे शेतकार मशागत करपा खातीर यत्न करतात, तांकां सगळे तरेचो आदार दिवपाचो आमदार विजय सरदेसाय, मंत्री म्हूण आपलो आनी सरकाराचो यत्न आसा. हे मुखारूय आनीक बांयो बांदपाच्यो आसात जाल्यार त्यो लेगीत मंजूर जातल्यो. हें काम सोमारच्यान सुरू जातलें आनी चडांत चड दोन म्हयन्यां भितर पुराय करतले. गोंयभरांत सुमार हजारभर बांयो उदकास्रोत खात्या कडल्यान बांदतले. बांयो प्रदुशीत जातात हे संबंदांत मंत्री सुभाष शिरोडकार हांणी सांगलें, रांदचे कुडींतलें तशेंच घाणयारें उदक उक्ताडार सोडचे न्हय. दरेकल्यान आपल्या घरा खातीर, आस्थापनां खातीर घाणयारें उदक कनेक्शन घेवपाची गरज आसा, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
