भांगरभूंय | प्रतिनिधी
मार्ना, शिवोली १४.७६ लाखांचें चोरी प्रकरण
म्हापशें ः मार्ना-शिवोलेच्या एका घरांत जाल्ल्या १४.७६ लाख रूपयांच्या मुद्देमालच्या चोरी प्रकरणांतल्यान मास्कमॅन टोळयेंतल्या मारिया बाप्तिस्ता उर्फ सांतान (रा. बाणावली) आनी मोहम्मद शेखमिया सुफियान (कालकोंडा-मडगांव) ह्या दोगांची पुराव्यांच्या उणावाक लागून म्हापशें न्यायालयान निर्दोश सुटका केली.
हे चोरयेचे घडणुकेक २७ मार्च २०२४ दिसा १२.३० ते सकाळीं ६.३० वेळार घडिल्ली. मार्ना, शिवोलेचे फिर्यादी सार्थक गुप्ता हांच्या व्हिलाचे पयले माळयेर एका बेडरूमच्या जनेलाची जाळी कापून दुबावितांनी भितर प्रवेश केलो. आनी फिर्यादींच्या पालकांचे वट्ट ११ लाख ६१ हजार रुपया किमतीच्यो भांगरा वस्ती आनी ३ लाख १५ हजार रुपया रोख रक्कम चोरली.
उपरांत ऑक्टोबर २०२४त पर्वरे पुलिसांनी हे टोळयेक उक्तडार हाडिल्लें. तेन्ना वयल्यो चोरयोय मारिया बाप्तीस्ता आनी मोहम्मद सुफियान हांणीच केल्ल्याचें उक्तें जाल्लें.
ते प्रमाण हणजूण पुलिसांनी दुबावितां आड भा.दं.सं.च्या ३८० आनी ४५७ कलमा खाला घरफोडीचो गुन्यांव दाखल करून तांकां अटक केल्ली. तशेंच न्यायालयांत आरोपपत्र सादर केल्लें.
ह्या खटल्यांत आरोपी आड आरोप निश्चीत कपाचे काय ना हे विशीं न्यायालय सुनावणी करतालें. सुनावणे मजगतीं, सरकारी वकिलांनी पुराय रेकॉर्ड सादर केले. मात ह्या प्रकरणांत आरोप केल्ल्या प्रमाण आरोपींचो गुन्यांवा कडेन संबंद आशिल्ल्याचे पुरावे रॅकॉर्डांत नाशिल्ले.
तशेंच ह्या प्रकरणांत कसलेच तरेची वसुली वा खुलासा पंचनामोय नाशिल्लो. सरकारी वकिलांनी सीसीटीव्ही फुटेजचेर भर दिली, जातूंत एक मनीस दिसतालो. मात आरोपी तोच काय न्हय हें स्पश्ट नाशिल्लें. युक्तिवादा उपरांत न्यायालयान मारिया बाप्तीस्ता उर्फ सांतान आनी मोहम्मद सुफियान ह्या दोनूय आरोपींक ह्या चोरी प्रकरणांतल्यान निर्दोश मुक्त केलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
