भांगरभूंय | प्रतिनिधी
नवी दिल्ली, खबरां संस्था ः मासिक पाळयेच्या वेळार बायलांक पगारी सुटी दिवपा विशीं केंद्रीय मंत्री स्मृती इराणी हांणी केल्लें विधान सध्या चर्चेंत आसा. मासिक पाळी हें शारिरीक दुयेंस न्हय, देखून पगारी सुटी दिवपाचो प्रस्नूच येना अशें तिणें म्हणिल्लें. कांय जाणांनी तिच्या विधानाक तेंको दिलो, जाल्यार कांय जाणांनी विरोध केलो. हे विशीं बॉलिवूड अभिनेत्री कंगना रणौत हिणेंय प्रतिक्रिया दिल्या.
स्मृती इराणीच्या विधानाची म्हायती दिवपी पोस्ट शेअर करून कंगना हिणें आपल्या इंस्टाग्राम स्टोरींत मत उक्तायलां. इराणीच्या ह्या विधानाक तेंको दितना कंगनान बरयलां, काम करपी बायल (वर्किंग वूमन) ही एक मिथक, कारण मनशाच्या इतिहासांत आतां मेरेन काम न करपी एकूय बायल ना. शेतांत काम करप ते घराची देखरेख आनी भुरग्यांचे पालनपोशण मेरेन बायलां सदांच काम करतात. ह्या काळार तांच्या कुटुंबाच्या, समाजा कडेन वा देशा कडेन आशिल्ल्या जापसालदारकेच्या वाटेर खंयच्योच गजालीं आडमेळें थारुंक नात.
कंगना म्हणटा, जो मेरेन एक विशिश्ट वैजकी स्थिती ना तो मेरेन बायलांक मासिक पाळी येवपा खातीर पगारी सुटीची गरज ना. कृपा करून एक गजाल समजून घेयात की ही मासिक पाळी, कसलें शारिरीक दुयेंस न्हय.
स्मृति इराणीन कितें म्हणलें?
राज्यसभेंत ह्या विशयाचेर उलयतना स्मृति इराणीन म्हणलें, मासिक पाळी बायलांक आडखळ न्हय. तांच्या जिवितांतल्या प्रवासांतलो तो एक भाग. आतां कामगार बायलांच्या नांवान मासिक पाळी खातीर पगारी सुटी दिवपाची गजाल अर्थहीन जाल्या. बायलांक समान हक्क मेळचे नात अशे प्रस्न आमी मांडूंक फावना. मासिक पाळी सुटयेक लागून बायलां कडेन भेदभाव जावंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
