भांगरभूंय | प्रतिनिधी
माशेल : माशेलांतल्या पोरण्यां नुस्त्या मार्केटाचें पाखें पडपाक पावलां. ताच्या पोंदां लागींच आशिल्ल्या मास विक्री दुकानांत आयिल्ले गिरायक, बिगर गोंयकार तशेंच थळावे लोक ते शेडींत उबे रावतात. ती लवंडिल्लें पाखें केन्नाच पडपाक शकता. ताच्या पोंदां लोक आसतना तें पडलें जाल्यार कितेंय जावं येता. पंचायत हे गजाली कडेन आडनदर करता, हे खातीर थळाव्या लोकांनी तिडक उक्तायल्या.
माशेलांतल्या पोरण्यां नुस्त्या मार्केटांतल्यान नुस्तें विक्रेत्यांक कदंब बसस्टॅण्डार बांदिल्ल्या नव्या नुस्त्या मार्केटांत स्थलांतरीत केल्यात. त्या पोरण्या नुस्त्या मार्केटाचे कुशीचे शेडींत चिकन आनी मटण विक्री करतात. ताका लागून सकाळच्या आदेसाक थंय चिकन- मटण व्हरचे खातीर गिरायक व्हड प्रमाणांत आसतात. तातूंतले कांय जाण ह्या लंवडिल्ल्या पाख्यां पोंदा उबे रावून चकाटां मारतात. तेच शेडीचे कुशीक कांय भाजी विक्रेतीं बायलां वेवसाय करतात. ताका लागून थंय लोकांचें येवप- वचप आसता. कितलेशेच खेपे ते शेडी पोंदा बिगर गोंयकार उबे राविल्ले दिसतात. सध्या त्या पोरण्यां नुस्त्या मार्केट शेडीचो कसलोच वापर जायना आनी ताचें पाखें लवंडिल्ल्यान धोकादायक जालां. तें पाखें पडून कसलीच वायट घडणूक घडचे आदीं पंचायतीन हातूंत लक्ष घालून निदान ते शेडींत कोण वच्चो ना हाची तजवीज करची, अशी लोकांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
