भांगरभूंय | प्रतिनिधी
चिखलकालो हो हिंदू संस्कृतायेचो एक भाग. हो आगळो उत्सव. देवकीकृष्णाच्या देवळाच्या मैदानाचेर गर्देंत सगल्या लोकांनी चिखलांत मस्ती करप हें ह्या उत्सवाचें खाशेलपण.
गोंय सरकाराच्या पर्यटन खात्यान माशेलांतल्या इतिहासीक श्रीदेवकी कृष्ण देवळांत तीन दिसांचो चिखलकालो राज्य पावंड्या वयलो उत्सव म्हूण कांय वर्सां पयलीं जाहीर केला. गोंयकारां खातीर ही मानाची गजाल. फाटल्या दोन दिसां सावन थंय विविध कार्यावळी आयोजीत केल्यात. तातूंत परंपरीक शिवराक जिनस रांदप, नाचू किर्तनाचे रंगी ही कार्यावळ, विठ्ठल वारी हो भक्तीगितांचो कार्यक्रम जातलो.
गोंयांत आषाढी एकादशीच्या दुसरे दिसा चिखलकालो, धंय हंडी, गोपाळकालो अशे साबार सांस्कृतीक कार्यक्रम जातात. फोंड्यां विठोबाच्या देवळांत, साखळे व्हाळवटार हे उत्सव बाळगोपाळ मेळून उमेदीन मनयतात. सगल्या पिराय गटांतले लोक थंय येतात. लोकांचे एकजुटीचें हें प्रतीक.
माशेलांतल्या देवकी कृष्ण देवळांतलो चिखलकालो सामको फामाद. धो धो पडपी पावसांत भिजत भक्तगण जय विठ्ठलच्या गजरांत तो मनयतात. सकाळीं इकरा सावन बाळगोपाळां वांगडा चिखलकाल्यांत वांटो घेवपी लोक एका जाग्यार जमतात. जय विठ्ठल, हरी विठ्ठलाच्या गजरांत दाडसकाळ देवळा कडेन वचून कपलाक तिबो लायतात. मागीर विठ्ठलाचो जयघोश करीत देवळाक प्रदक्षिणा घालतात आनी देवळांतले दिवले भोंवतणी ताल धरून घंटानाद करतात. मागीर आंगार तेल लावन चिखलांत देवतात.
श्रीकृष्ण बालक्रिडेक सुरवात जाता. दोळ्यांक कपडो बांदून धरचेल्यांनी खेळटात. शक्ती प्रदर्शन, बेबुक उडक्यो, फाटल्यान कपडो उडोवन, बाॅल उडोवन खेळटा. अशे तरेकवार खेळ आसात. हे सगळे चिखलांत खेळटात. मागीर न्हवरो व्हंकलेचें लग्न लायतात. बँड वाजयतात, नाचतात. सगले चिखलांत मौज, मस्ती करतात. हें विलक्षण दृश्य पळोवपाक हजारांनी भावीक, पर्यटक माशेलांत येतात. हो आनंद, जोष, भक्तीचो त्रिवेणी संगम.
चिखलकालो हो हिंदू संस्कृतायेचो एक भाग. हो आगळो उत्सव. देवकीकृष्णाच्या देवळाच्या मैदानाचेर गर्देंत सगल्या लोकांनी चिखलांत मस्ती करप हें ह्या उत्सवाचें खाशेलपण. चिखलकालो म्हणल्यार गोंयची अभिव्यक्ती. राज्यांतल्या पावसाळी पर्यटनाचें एक मुखेल आकर्शण. गोंयचे संस्कृतींत श्रद्धा, लोकभावना कितली खोल मेरेन रुजल्यात, ताचें हें उदाहरण. हो उत्सव गोंयचे संस्कृतायेची गिरेस्तकाय लोकां सामकार हाडटा. चिखलकाल्याचो अणभव सगल्यांनी घेवपाक जाय. मातयेंतली ही बालक्रीडा पळोवपाक सगले माशेलांत वचुंया.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
