भांगरभूंय | प्रतिनिधी
27 जाणांनी केलें रक्तदान
माशेल: माशेल तारीवाडो हांगच्या साईबाबा स्पोर्ट्स क्लबा वतीन हालींच रक्तदान शिबीर आयोजीत केल्लें. ह्या शिबिरांत 27 दात्यांनी रक्तदान केलें. रक्तदान शिबीर श्री साईबाबा भक्त देवूळ तारीवाडो, माशेल हांगा जालें.
ह्या रक्तदान शिबिराच्या उक्तावणा वेळार मुखेल सोयरे उद्देजक लक्ष्मण (बाबू) रायकार आनी डॉ. नरेश सुरेश फडते, खास आमंत्रीत म्हणून जिल्हो पंचायत वांगडी श्रमेश भोसले, माशेलचे सरपंच जयेश नायक, थळावे पंच वांगडी सिध्दार्थ गाड, क्लबाचे अध्यक्ष चंदू तारी आनी हेर मानेस्त हजर आशिल्ले.
मानेस्तांक राहुल तारी हांणी फुलांचो तुरो भेटोवन येवकार दिलो. ह्या वेळार चवथी निमतान आयोजीत गणपती सजावट सर्तीचें पयलें इनाम राहुल तारी, दुसरें दत्तदिप तारी, तिसरें मंथन सावंत, उमेद वडोवपी इनाम आदित्य परब, विजय गावडे हांकां फावो जालीं. मानेस्तां हस्तुकीं हीं इनामां भेटयलीं.
कार्यावळीचें सुत्रसंचालन धर्मानंद खोलकार आनी उपकार सिध्दार्थ गाड हांणी मानले.
इनामां भेटवण कार्यावळी उपरांत जाल्ल्या रक्तदान शिबिरांत 27 जाणांनी वांटो घेतलो. ह्या वेळार बांबोळी मॅडिकल कॉलेजचे रक्तपेढीचे डॉ. पाश्कॉल डिसोझा, लॅब. टेक्निशियन पिएदाद फर्नांडीस, मॅडिकल स्पेशल वकॅर सिद्धेश गांवस, परिचारिका शेरलीन, एम. टी. एस. तुषार, चालक श्रीकृष्ण, विराज हे हजर आशिल्ले.
हें शिबीर येसस्वी करपा खातीर क्लबाचे पदाधिकारी आनी वांगड्यांनी सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
