भांगरभूंय | प्रतिनिधी
माशेल: तिवरें, वरगांवचे सरपंच जयेश नायक आनी उपसरपंच एकनाथ परब हांचे आड आयज अविस्वास थाराव दाखल केला. वट्ट पांच पंच वांगड्यांची सय घेवन तांची नोटीस फोंडें गटविकास अधिकार्या कडेन दिली.
ह्या अविस्वास थारावाचे नोटीशीचेर पंच वांगडी अपर्णा संकेत आमोणकार, फ्रान्सिस आय लोबो, सिध्दार्थ जी. गाड, शिल्पा वेरेंकार, सुमित्रा पी. नायक हांच्यो सयो आसात. ह्या थारावाचे नोटीशीचेर पंच वांगड्यांक विस्वासांत घेवप ना, पंचायत कारभाराचो गैरवापर करप, उदरगतीच्या कामांत सहकार्य करप ना, बेशिस्तपणान आनी हुकुमशाय पद्धतीन पंच वांगड्यां कडेन वेव्हार करप, सरपंच आनी उपसरपंचांनी आपल्या कर्तव्यांत निश्काळजीपणां करप, अशीं कारणां नोंद केल्यांत.
ह्या गटांतली पंच वांगडी अपर्णा संकेत आमोणकार कांय म्हयन्यां पयलीं विरुद्ध गटांत गेल्ल्यान ह्या गटाचे सत्ताधारी जावपाचे विचार फळाक येवंक नाशिल्ले. आतां तीच परत आदल्या आपल्या गटांत आयिल्ल्यान हो अविस्वास थाराव दाखल जाला.
प्रियोळ मतदारसंघांतले राजकी नदरेन म्हत्व आशिल्ले हे पंचायतींत फाटले कितलेशेच दीस सत्ता बदला खातीर गुपीत अनेक घडामोडी चालिल्ल्यो आनी निमाणें तातूंत तांकां येस आयलें. एकंदर ह्या गटांत पंच वांगडी अपर्णा आमोणकार आयिल्ल्यान अविश्वास थाराव हाडप शक्य जालें. हाका लागून ती सरपंच पदाच्यो घटमूट दावेदार आसात. तरी तांतलो एक पंच वांगडी आपल्याक पयलें सरपंचपद जाय असो हट्ट धरपाची शक्यताय न्हयकारूं येना. तरी आमदार गोविंद गावडे रणनीती खेळुन पंचायत सत्ता आपल्या कडेन दवरतले, अशी चर्चा सध्या माशेलांत चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
