भांगरभूंय | प्रतिनिधी
भांगरभूंय । प्रतिनिधी
काणकोणः माशें हांगच्या निराकार शिक्षण संस्थेच्या श्रीमती सत्यवती सोयरू आंगले उच्च माध्यमीक विद्यालयांत दोन दीस राष्ट्रीय विज्ञान दीस मनयलो. आंतरराष्ट्रीय नामनेचो भारतीय विज्ञानीक सी व्ही रमण हांच्या “रमण इफेक्ट ” ह्या संशोधनाचे यादस्तीक दर वर्सा 28 फेब्रुवारीक व्हो दीस मनयतात. मात बारावेची परिक्षा त्याच दिसा सुरू जाली देखून तो एक दीस आदीं मनयलो.
संस्थेचो सचीव नंदा सतरकार हाणे दिवली पेटोवन कार्यावळीचें उक्तावण केलें. ह्या वेळार कल्पेश वेरेकार हे मुखेल सोयरे म्हणून हाजीर आशिल्ले. आपल्या भाशणात ताणे आत्मनिर्भर भारताचें सपन प्रत्यक्षांत हाडपा खातीर विज्ञानाची वाट धरप, विकसीत भारताचें ध्येय हासातपा खातीर विद्यार्थ्यांनी विज्ञानीक दृश्टिकोन आपणावपाक जाय अशें सांगलें. कार्यावळीची येजमानकी प्रशांत नायकान चलयली. सर्गेस्त डॉ श्रीराम लागू सारक्या नामनेच्या कलाकारान अंधश्रद्धा निर्मूलन चववळींत केल्ल्या कामाची ताणे विद्यार्थ्यांक म्हायती दिली.
विज्ञान दिसा निमतान आयोजीत केल्ल्या विज्ञान प्रकल्पांत श्री निराकार विद्यालयान पयलें, मल्लिकार्जुन उच्च माध्यमीक विद्यालयान दुसरें, आनी बलराम डे कॅर स्कूलान तिसरें इनाम मेळयलें. प्रश्नमंजुषा सर्तींत मल्लिकार्जून उच्च माध्यमीक विद्यालयाक पयलें. निराकार विद्यालयाक दुसरें आनी सेंट सेबेस्तियांव हायस्कुलाक तिसरें इमाम मेळ्ळें. डॉक्युमेंटरी सर्तींत श्री श्रद्धानंद विद्यालयाक पयलें, निराकार विद्यालयाक दुसरे, गुरुकूल विद्यालयाक तिसरें इनाम फावो जालें. नाटिका सर्तींत- श्रद्धानंद विद्यालयाक पयलें, तुडल हायस्कुलाक दुसरें, सरकारी उच्च माध्यमीक विद्यालयाक तिसरें इनाम दिलें. बास्केट पेंटीग सर्तीत सरकारी उच्च माध्यमीक विद्यालयाक पयले, बलराम डे कॅर स्कुलाक दुसरे, आनी श्रद्धानंद विद्यालयाक तिसरें इनाम मेळ्ळें.
कार्यावळीचे सुरवेक प्राचार्य हेमंत कामत हाणे प्रास्तावीक केलें. कार्यावळीचें संयोजन शिक्षिका चंद्रलेखा मेस्त्रीन हिणे करून निमणे उपकार मानले. दोनूय दिसाच्या कार्यावळीचें सूत्रसंचालन शिक्षिका तृप्ती आजगांवकार, फ्रिडा फर्नांडीस आनी कविंद्र फळदेसाय हाणे केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
