भांगरभूंय | प्रतिनिधी
आयचें यूग खुबूच ल्हान जालां. काल आशिल्लो मनीस आयज झळकेक मेळना. एक तर तो पोटा खातीर परदेशांत पावता ना जाल्यार देवाधीन जावन सर्गांत आसता. उरतात त्यो यादी आनी तांचीं उतरां. असोच आमचे मदलो कवी युसूफ ए शेख, 2017 वर्सा ‘माशाल्लाह हांवें तुजो मोग जोडला’ ह्या आपल्या निमाण्या पुस्तका वरवीं आपलीं उतरां दवरून गेलो. हें पुस्तक म्हळ्यार ताच्या विचारांचें भांडार, अणभव विश्वाचो अविश्कार. ‘ओ रे सोय’, ‘म्हाकाय ओडून व्हरात गो’, ‘शब्दुलेच्या फुला तुका भंवरो जावन चिंवतलों’ हे सारकीं फामाद गितां रचिल्ल्या युसुफाची ही निबंध रचना. तातूंत तो म्हणटा, “खंयच्यान तरी स्फूर्त मेळत रावता आनी प्रतिभा जागत आसता. मागीर आपले कडसून साहित्य घडून येवप होच लेखकाचो हावेस आसता. आमकां पाखां नासतात, पूण हावेसाच्या पाखांनी उंच उंच उडपाचे आमचे यत्न चालूच आसतात… आमकां सगळ्यांक संकुचीत वृत्ती पासून बरेंच पयस वचपाचें आसा. सबंद संवसारांतल्या लोकाचे पिडे आड झुजपाची शक्त आमच्या साहित्यांत येवपाची गरज आसा. प्रत्येक मनशाक लाव मेळुंयेता अशें साहित्य आमचे कडल्यान घडपाक जाय. सबंद संवसाराक उजवाड दिवपी सूर्याची रोशणाय आमचे लिखणेंत देंवतली अशी इत्सा बाळगुंया.” कोंकणी साहित्याक खूब योगदान दिल्ल्या कवी युसुफाची ह्या पुस्तका खातीर तुस्त करूंक जाय. 100 पानांच्या ह्या पुस्तकांत 16 निबंध आसात. तें लोकमान्य प्रोसेसान छापलां आनी कोंकण दिवो प्रकाशनान उजवाडायलां. ताचें मोल 200 रूपया आसा. पुस्तकाचें मुखेल चित्र बरोवप्यान स्वता डिजायन केलां आनी फाटल्या पानाचेर ताची थोडीशी वळख वाचूंक मेळटा. युसुफाच्या अणभवाच्या पुस्तकाची वळख तुमचे खातीर.
फाटभूंय
युसुफबाबाची वाचप्यांक संदेश दिवपाची इत्सा ह्या पुस्तकांत दिसून येता. ताणें आपल्या जिवितांत जायते इश्ट जोडले आनी कितले जण सोडुनूय गेले. पूण नवे इश्ट मेळतूच रावतकच मोगाचे वाटेक गती मेळत रावली. ह्या इश्टां वरवींच तो ‘वसुधैव कुटुंबकम’ संकल्पनेचो विचार फुडें घेवन गेलो. सबंद पुस्तकांत खंय ना खंय, एक ना जाल्यार दुसऱ्या निबंधांत आपल्या इश्टांचीं नांवां ताणें आस्पावल्यांत आनी आपलें नातें फुडें दाखयलां. नोकरी करतना खूब कडें ताच्यो बदल्यो जाल्यो, ह्या बदल्यांच्या काळांत जिणेक आफडून गेल्ले अणभव थिरावपा खातीरूच वाचप्यांक घड्ये ताची निमाणी भेट आशिल्ली आसत. निमाणो निबंध ‘म्हाका भेटिल्ले पुरुशोत्तम बाब काकोडकार’ हेंच सिद्ध करता. मनशा कडलें नातें जियेवपाची प्रेरणा ह्या पुस्तकांत मेळटा.
पुस्तकांतली भास
पुस्तकांतली भास बरीच सोंपी, सरळ आनी समजुपा सारकी आसा. ताणें वापरिल्ल्यो ओपारी वाचप्याक संमजूंक अवघड जावंच्यो न्हय म्हण त्यो ताणें इंग्लेजींतूच दवरल्यात आनी तांकां सुडसुडाय आयल्या. बरोवप्याचे विचार खयंच आडखळिल्ले दिसनात. निबंधांत बारीक नदर आनी भावपणाची भास झळकता. सामान्य मनीस जसो वागता, तशी पुस्तकाची भास आसा.
बरोवप्याचें उमेदी मन
पयल्याच निबंधांत ‘आमी खंय गा उरतले’ हातूंत युसूफ 2008 वर्सा आपणाक थॉमस स्टिफन्स कोंकणी केंद्रान भेटयल्ल्या पुरस्काराची याद करतना आर्च बिशप भोवमानेस्त फिलीप नेरी फेर्रावाच्या हातांतल्यान पुरस्कार स्विकारूंक मेळिल्ल्याची खोस उगतायता. जाच्या नांवान तो पुरस्कार आसा तो पाद्र आंतोनियो पेरेरा हाचें नांव आपणाक जुळ्ळां हाचो अभिमान बाळगिता. तशेंच आपल्या इश्ट बरोवप्यांक तो वयर काडपाचो यत्न करता.
खाशेलेपणां
पुस्तकांत परत परत देवाचें नांव घेवन तो आपणा बराबर वावरिल्ल्यांचे उपकार मानता. कांय कडें तांचें व्हडपण गायता. सहजा कोणूय इतलो खाल्तो जायना पूण युसूफ तें धाडस दाखयता. ‘मोगाचीं नातीं’ ह्या निबंधांत तो आदलो राश्ट्र्पती अब्दुल कलाम हांच्या भुरगेपणांतले खरपल्ले भाकरेचे काणयेची याद करून जिविताचो पाठ घालून दिता, समाजीक कर्तव्याची जाणविकाय करून दिता. गांधिजीचीं आनी हेर म्हान मनशांचीं उतरां वापरून जिविताचें म्हत्व दाखयता. ‘अपरूप गितकाव्य’ ह्या निबंधांत बरोवपी कितलेश्याच कविंची आमकां वळख दिता. तशेंच ‘कोंकणी गीत आनी संगीत – एकमेकांच्या सोदांत’ ह्या निबंधांत गीत- कांताराचें नातें दाखयता. असोच, गितांची आनीक म्हायती दिवपी निबंध म्हळ्यार ‘गीत कशें घडटा.’ तेच बराबर ‘गोंयां उर्दू भाशेचेर कोंकणीचो प्रभाव’ हातूंत कोंकणी आनी उर्दू भासां मदें कितलें लागींपण आसा तें दाखोवपाचो यत्न करता.
कांय सुविचार
हिकमतीन जियेतल्या मनान कितलें शिटूक आसूंक जाय हाच्यो तो देख दिता. ‘सायबा भोगोस’ ह्या निबंधांत बरोवपी म्हणटा, “राग म्हणजे उजवाडाचे वाटेवेलें अरिश्ट. राग मनशाक अंधकारा वटेन व्हरता. काळखाक काळोख ना करपाक शकना फकत उजवाड काळखाक मिटोवंक शकता. तेच परीं रागाचेर उपाय राग न्हय, रागाचेर एकमेव उपाय म्हणजे मोग.” ‘बरो मनीस वायट मनीस’ ह्या निबंधांत बरोवपी म्हणटा, “धर्म आमकां आमच्यांतली पशुवृत्ती सांडपाक सांगता आनी मनीसपणाची वाट दाखयता. धर्म आमकां दैवीक उंचाय जोडपाक शिकयता…” दर एका निबंधांत खंय ना खंय असले जायते सुविचार ह्या पुस्तकांत वाचूंक मेळटात.
कांय इंग्लेज ओपारी
‘देर इज एवरीथींग टू मीट एवरीवन्स नीड; बट देर इज नथींग टू मीट एवरीवन्स ग्रीड.’ ‘सिन्सियोरिटी इज द एसेन्स ऑफ वर्शीप.’ ‘द मोमेन्ट देर सास्पिशन अबावट अ पर्सन्स मोटीव्स, एवरीथींग ही डाज गेट्स टेइन्टेड.’ ‘म्युजीक इज लायक अ सेकंड सोल ऑफ अ ह्युमन बींग.’ हे सारक्यो आनीक जायत्यो ओपारी वाचूंक मेळटात.
अभिप्राय
युसुफान बरयल्ले पांच अभिप्राय ह्या पुस्तकांत वाचूंक मेळटात. पंढरीनाथ डी लोटलीकार हाचें ‘उदेंती किर्णां ‘, आंद्रे फेर्नांडिसालें ‘काळें फूल’, मिनिनो आल्मेदाचें ‘हांव तो हांव’, मिलिंद काकोडकाराचें ‘संगत’ आनी अनील कामत शंखवाळकार हाचें ‘मोतयां, ह्या पुस्तकां विशीं ताणें आपले विचार मांडल्यात.
सोंपयतना…
बरोवपी एक रेडियो स्टार जाल्ल्यान ताचें साहित्यिकां कडें चड नातें. तो नोकरे वेल्यान गोंयांत येतालो तेन्ना ताचें चडशें उठप- बसप साहित्यिकां कडें आसतालें. ताचे बरे विचार ‘ओ रे सोय’ ह्या ताच्या नेमाळ्यांतल्यानूय पर्गट जाल्ले वाचूंक मेळ्ळ्यात. ह्या पुस्तकांत बरोवप्यान आपणा भोंवतणच्या घडणुकांचें चित्रण दर्शयलां आनी रुचीक अणभव घाल्ल्यान हें पुस्तक चड वाचनीय जालां. ‘माशाल्लाह हांवें तुजो मोग जोडला’ म्हण बरोवपी जरी देवाक सांगता जाल्यार पासून ताची भावना आमकांय बोट दाखयता. पुस्तक जेरूल वाचून पळेवंचें.
—
– विन्सी क्वाद्रूस,
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
