भांगरभूंय | प्रतिनिधी
नदीम अहमद हांचो प्रवास म्हणल्यार आवड आनी जिद्द कशी फुडें व्हरपाची, हाचें एक व्हड उदाहरण. माहिती तंत्रज्ञान मळार शिक्षण घेवन, इलेक्ट्रॉनिक्स पदवी आनी हार्डवेअर इंजिनियरिंगाचो अणभव आसून लेगीत, ताणें संगणका मुखार बसप सोडलें आनी गोंयचे क्रिकेटीचो एक फामाद आवाज जालो.
दरवर्सा पावसा उपरांत गोंयांत क्रिकेट सुरू जाता, तेन्ना मैदानाचेर नदीम हांचोच आवाज आयकूंक येता. इंग्लीश आनी हिंदी भाशेंतली तांची कॉमेंट्री आनी उलोवपाची पद्दत सगळ्यांक खूब आवडटा. देखूनच, तांकां ‘गोंयचे क्रिकेटीचो आवाज’ मानतात. कॉमेंट्री करपाची ताची सुरवात 2010 वर्सा जाली. क्रिकेटीच्या मोगान ताका एमपीटी मैदानाचेर एका टी- 20 टुर्नामेंटांत पहिली संद मेळ्ळी. ताचें क्रिकेटचें गिन्यान आनी उलोवपाचो आत्मविश्वास पळोवन सगळ्यांनी तांची तोखणाय केली. थंयसून तांचें नवें करियर सुरू जालें.
त्याच वर्सा, गोंय क्रिकेट असोसिएशनन जेन्ना पयली ‘गोंय प्रोफेशनल लीग’ (GPL) सुरू केली, तेन्ना नदीम अहमद हांकां अधिकृत कॉमेंटेटर म्हणून नेमले. तांणी हें काम इतले बरे तरेन केलें की जीसीएच्या अधिकार्यांनी तांचो भोवमान केलो. उपरांत तांकां फातोड्डें मैदानाचेर भारत आनी ऑस्ट्रेलिया मदल्या क्रिकेट मॅचाक कॉमेंट्री करपाची व्हडली संद मेळ्ळी. ह्या कामाक लागून तांकां देशभर वळख मेळ्ळी. तांचो बरो आवाज, नितळ उच्चार आनी भाशेचेर आशिल्ली पकड देखून ते गोंयांतलो नंबर वन कॉमेंटेटर जालो.
तांणी मडगांव, शिरोडा, वास्को आनी बाळ्ळी सारख्या जाग्यांचेर जायत्या मॅचींनी काम केलां. तशेंच, राजस्थान आनी गुजरातातूंय ते गेल्ले. इतलेंच न्हय, तर नेपाळांतल्या काठमांडू शारांत वचून तांणी आंतरराष्ट्रीय मळार काम केलां. असो मान मेळोवपी ते गोंयचे एकलेच कॉमेंटेटर. आयज लेगीत जीसीएची पहिली पसंती नदीम अहमदच आसतात. गोंयच्या व्हडल्या लीग मॅचींनी तांचो आवाज आसताच, पणजी जिमखाना आनी हेर जायत्या क्रिकेट क्लबां खातीर ते काम करतात.
नदीम हांची एक खाशेली गजाल म्हणल्यार, ते सदांच नवें शिकपाक सोदतात. स्वता अभ्यास करून तांणी हिंदी कॉमेंट्रींतूय प्राविण्य मेळयलां. तांच्या उलोवपांत क्रिकेटची म्हायती तर आसताच, पण त्या वांगडा एक वेगळीच उर्बा आसता.
आयज नदीम अहमद गोंयांतलो एक मान मेळिल्लो कॉमेंटेटर आसा. तांचो हो ‘मावसा सावन मायका’ मेरेनचो प्रवास प्रेरणा दिता. तांची मेहनत पळयल्यार, फुडें तांचो आवाज आनीक व्हडल्या आंतरराष्ट्रीय मैदानांचेर गाजतलो हांतूंत दुबाव ना, देखूनच तांकां मोगान ‘गोंयचो रवी शास्त्री’ म्हण्टात.
अॅड. विनायक (मामा) डी. पोरोब.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
